کوردپرێس:

شەوی دووشەمە 8ی جوونی 2020 بە هۆی تەقینەوەی بۆمبێکەوە لە سەر ڕێگای تێپەڕینی کرێکارەکانی ناوچەی بەلبوکا لە نێوان شاری چاتاکی پارێزگای کوردنشینی وان و ناوچەی پەرواری لە پارێزگای سێرت، 2 کرێکار گیانیان لە دەست دا و 8 کەسی دیکەش بریندار وون.

ئاژانسی هەواڵی T24 ڕایگەیاند پاسی تایبەتی کرێکارانی جادەی نێوان وان و سێرت شەوی ڕابردوو لە کاتی تێپەڕین بە جادەی چاتاک و پەرواری بۆمبێکی پێدا تەقییەوە و پاش ڕووداوەکەش بریندارەکان گوازرانەوە بۆ نەخۆشخانەی دەوڵەتیی وان و لە شوێنی ڕووداوەکەش ڕێوشوێنی توندی ئەمنی گیراوەتە بەر.

شایانی باسە تا ئەم کاتە هیچ لایەن و گرووپێک بەرپرسیارێتیی ئەوتەقینەوەیەی نەگرتۆتە ئەستۆ بەڵام پارێزگاری وان لە بەیاننامەیێکیدا نووسیویەتی PKK بکەری تەقینەوەکە بووە.