کوردپرێس: دەرباز محەمەد ئەندامی خانەی ڕاپەڕاندنی بزووتنەوەی گۆڕان بە دەنگی ئەمەریکا دەڵێت: ئێمە لە سۆنگەی بەرپرسیارێتیمان وەک هێزێکی سیاسیبە تایبەت، کە بەشدارین لە حکومەت، بەرپرسیارێتی بارودۆخی خەڵک دەکەوێتە ئەستۆمان، سەبارەت بەو بابەتەی (زینی وەرتێ) بوو بە بابەتی میدیایی و بابەتی سیاسی نێوان ئەو دوو پارتە(پارتی دیموکراتی کوردتان و یەکێتی نیشتمانی کوردستان) یەکەم ئەمەی ئێستا دەیکەن هیچ پێویست نیە و هیچ پاساوێک نیە بەبەیاننامە و بەیاننامەکاری بکرێت.

دەرباز محەمەد دەشڵێت پێم وایە بەشی زۆری ئەو بابەتە دروستکراوە بەتایبەت ئەوەی باسی جیاوازیی نێوان هەولێر و سلێمانی دەکرێت بەڵێ لەهەموو دنیادا پایتەخت بەحوکمی ئەوەی وەزارەتەکانی لێیە زیاتر مومارەسەی دەسەڵاتەکانی خۆی دەکات بەڵام ئەمەش مانای ئەوەنیە پارێزگاکانی تر بێ بەش بن لەدەسەڵاتەکان، دووەم ئێمە ئێستا حکوومەتێکی هاوبەشمان هەیە، سەرۆکایەتیێکی هەرێمی هاوبەشمان هەیە، پەرلەمان نوێنەری هەموو لایەنە سیاسیەکانی تێدایە لە ئێستادا هیچ جۆرە پاساوێک نیە بۆ ئەوەی کە بەیاننامە یان بە هێزی چەکدار گفتوگۆ بکەین بڕوامان وایە بەشی زۆری ئەو بابەتە دروستکراوە، ئەو بابەتە قەوانێکی کۆنە بەداخەوە زۆرجار گەرم دەکرێتەوە، پێمان وایە ئامانجی بەرتەسکی حیزبی تێدایە، بەهیچ شێوەیەک بەشێک نیە لە داکۆکی بەرژەوەندی میللەتەکە."

بابەتی جیاوازی کردنی نێوان شارەکان و گوێ نەدانی حکوومەتی هەرێم لەزاری کاندیدی ئێوە لەپۆستی پارێزگاری سلێمانیەوە بڵاوبوەوە یەکەمجار، کاندیدەکەی ئێوە گلەیی دەکرد حکوومەتی هەرێم وەڵامی سلێمانی ناداتەوە ئەو بوودجەیەی هاتووە بۆ هەرێم نەدراوە بەسلێمانی؟ لەوەڵامدا دەرباز محەمەد دەڵێت: نەخێر پارێزگار وتی، هێشتا نەگەیشتووە ئەوەش مانای ئەوە نیە، کە پارێزگار وتی هێشتا نەگەیشتووە واتە هێشتا نەگەیشتۆتە هەولێر و نەگەیشتۆتە دهۆکیش، مانای ئەوە نیە ستەمکرابێت لە سلێمانی ئەوەتا پارێزگاری هەولێریش دەڵێت ئێمەش مەغدروین، مەبەستم ئەوەیە ئێمە نابێت بەو نەفەسە کاربکەین مادام گفتوگۆ و یەک حکومەت و یەک پەرلەمان و یەک دۆسیەی هاوبەشی ئەم میللەتە، وە من ئەوە ڕاست بکەمەوە، پارێزگاری سلێمانی وتی نەگەیشتووە و خۆشمان قسەمان لەگەڵ کردووە هەر وایوت ئەمەش واتای ئەوە نیە ئەو بودجەیە هەرنایەت ناگات، ئەگەرنا هێشتا نەگەیشتۆتە هەولێر و دهۆک و گەرمیان و هەڵەبجەش مەبەستی پارێزگار ئەوەبوو کە خەڵک داوای لێدەکات ئەویش دەڵێت"کاکە" هێشتا نەگەیشتۆتە دەستی من تا بیدەم بە ئێوە."

هەروەها دەڵێت: مەبەستم ئەوەیە ئێمە پەرلەمان و حکوومەت و دادگا و ئەنجومەنی پارێزگامان هەیە، کاتێک پێت وایە غەدر لەسلێمانی دەکرێت، دەتوانی ئەو بەرپرسەی ئەو غەدرەی کردووە، بانگی دەکەیت لە پەرلەمان لێپێچینەوەی لەگەڵ دەکرێت.مەبەستم لە دروستکراو ئەوەیە ئەو کەسانەی ئەوە دەڵێن مەبەستیان بەرژەوەندی خەڵک نییە.

دەرباز محەمەد وتیشی: ئێمە لەگەڵ برادەرانی یەکێتی و پارتی قسەمان کردووە بۆ ئەوەی خاڵێک دابنێن و بڵێن ئیتر بەسە ئەم جۆرە گرژیە لەڕێگای بەیاننامەوە هیوامان وایە بەزوویی ئەم بارگرژیە نەمێنێ و قەناعەتیشمان وایە کە بەرەو نەمان دەچێت."

لەوەڵامی ئەو پرسیارەی بۆچی بزووتنەوەی گۆڕان بانگهێشتی کۆبونەوەی نێوان پارتی و یەکێتی نەکراوە کە واباس دەکرێت ڕەنگە ئەو دوو حیزبە کۆبونەوەی دوو قۆڵی ئەنجام بدەن؟ دەرباز محەمەد دەڵێت: بۆ ئێمە گرنگ ئەوەیە ئەو بارگرژییە نەمێنێت ئێمە هەم لەگەڵ پارتی هیچ کێشەمان نیە لەگفتوگۆ و دانیشتنداین، لەگەڵ یەکێتی-ش بەتیلفۆن پەیوەندیمان هەیە بەڵام نەگەیشتۆتە دانیشتنی فەرمی لای ئێمە گرنگ ئەوە بووە کە کێشەکە نەمێنێت ئەوە گرنگ نیە بەسێ قۆڵی دادەنیشین یا بەدووقۆڵی، خۆیان یەکێتی و پارتی بۆ ئەوەی یەکتر ببینین پێویستیان بەکەس نیە، یەکێتی سەرۆکی پەرلەمان و جێگری سەرۆکی هەرێم و حکومەتی هەیە یەکێتی و پارتی لەیەک دانەبڕاون، گرژییەک هەیە پێمان وایە دروستکراوە و دەبێت چارەسەر بکرێت."

دەربارەی بانگەشەی دوو ئیدارەیی و هەڵوێستی فەرمی بزوتنەوەی گۆڕان، د.دەرباز محەمەد دەڵێت: بەداخەوە ئەزموونی دوو ئیدارەیی پەڵەیەکی ڕەشە بە ناوچەوانی ئەزموونی سیاسی و مێژووی هەرێمی کوردستانە، بە هیچ شێوەیەک لەگەڵ ئەوە نیین باس لەمەسەلەی دوو ئیدارەیی بکرێت، بەڵام لەگەڵ ئەوەشدا هەتا سەر ئێسقان شەڕ لەسەر ئەوە دەکەین کە هەموو قەزاو ناحیەو پارێزگایەک کە ئەوەندە دەسەڵاتی لامەرکەزی خۆی هەبێت کە هەرکارێک لە قەزایەک لەڕێگەی قایمقامیەتەوە تەواو بێت پێویست نەکات بێتە سلێمانی، ئێمە پێمان وایە هیچ ئەزمونێکی حکومڕانی سەرکەوتوو بەبێ لامەرکەزیەتێکی ئیداریی لەسەر بنەمایەکی دیموکراتی ڕێکوپێک دروست نابێت و سەرناکەوێت و خزمەتی خەڵک ناکات، ئێمە پێمان وایە دوو ئیدارەیی تەنها دروشمێکە و بەرز دەکرێتەوە بۆ خەڵەتاندنی خەڵک ئەگینا کەس لەگەڵ دوو ئیدارەیی نیە ئەوانەی کەزۆر باسی دەکەن ڕاست ناکەن دوو ئیدارەیی مەبەستم بە دەستەواژەی 1998."

هەروەها وتیشی: دوو ئیدارەیی ناچێتە بەرژەوەندی هیچ کەسەوە، بەڵام بەرژەوەندی هەندێک کەس و لایەن بۆ ئەوەی واپیشان بدرێت کەداکۆکی لەخەڵکێک دەکەن داکۆکی لەسلێمانی دەکەن هەندێک کەس و لایەن."

دەرباز محەمەد جەختی کردەوە گرژییەکانی ئێستای نێوان پارتی و یەکێتی" بەدڵنیایەوە خەڵکی سیاسی دروستی دەکات، بەستەڵەکی نێوان یەکێتی و پارتی تواوەتەوە بەڵام نەبووە بە ئاو واتە ئەوان هێشتا لەکۆمەڵێک کێشەی سێ ، چوار ساڵی ڕابردوودا دەژین."

دەربارەی ئەو وادەیەی بزوتنەوەی گۆڕان داینابوو بۆ هەڵسەنگاندنی بەشداریکردنی لە حکوومەتدا ؟ دەرباز محەمەد دەڵێت" ئێمە هەرچی ڕەخنە و تێبینی خۆمان هەبوو بەنامەیەکی فەرمی داومانە بە پارتی دیموکراتی کوردستان،کار لەسەر ئەوە دەکەین کە هەموو ئەو تێبینیانە لەچوارچێوەی بەرنامەی سیاسی ئێمە و پارتیەوە، جێ بکرێتەوە و چاک بکرێت."

ناوبراو ڕاشیگەیاند" هێشتا لەقۆناغی ئەوەین کە بگەینە چارەسەر کە بەشێکیان ئاڵۆزن بەتایبەتی بۆ مەسەلەی چاکسازی و ئەنجومەنی چاکسازی لەگەڵ ئەوەین کە یاسایەک دەربکرێت، چەند دانشتنێک کراوە لە ئەنجومەنی وەزیران لە هەولێر پێش پەتای کۆرۆنا بۆ ئەوەی ڕەشنووسی پرۆژە یاساکە تەواو ببێت بۆئەوەی لەپەرلەمان پەسەند بکرێت و ئەو ئەنجوومەنە ئەرکی چاکسازی بگرێتە ئەستۆ کە ئەو ئەنجوومەنە سەرۆکەکەی لە بزووتنەوەی گۆڕان دەبێت".

کۆدی هەواڵنێر: 60113