بەپێی هەواڵی کوردپێس، سه‌رچاوه‌یێکی ئه‌منی له‌ پارێزگای به‌سره‌ رایگه‌یاند، شه‌وی رابردو له‌رێگه‌ی پێنج مووشه‌که‌وه‌ کۆمپانیایێکی ئه‌مریکی که‌ کار له‌ یه‌کێک له ‌کێڵگه‌ نه‌وتیه‌کانی پارێزگاکە ده‌کات کراوه‌ته‌ ئامانج.

سەرچاوەکە ئه‌وه‌شی خستوه‌ته‌ڕوو شه‌وی رابردوو کۆمپانیای هالبرتۆنی ئه‌مریکی که‌ له‌ کێڵگه‌یێکی نه‌وتی قه‌زای زوبێری رۆژئاوای به‌سره‌ کارده‌کات، له‌ شوێنێکی نادیاره‌وه‌، به‌پێنج مووشه‌ک کراوه‌ته‌ ئامانج.

هێزه‌ ئه‌منیه‌کان گه‌یشتونه‌ته‌ شوێنی که‌وتنه‌ خواره‌وه‌ی مووشه‌که‌کان، له‌ ئێستاشدا لێکۆڵینه‌وه‌ به‌رده‌وامه‌.

هەرلەمبارەوە کۆمپانیای نه‌وتی به‌سره‌ روونکردنه‌وه‌ له‌سه‌ر که‌وتنه‌خواره‌وه‌ی ژماره‌یێک مووشه‌ک له‌ نزیک کێڵگه‌یێکی نه‌وتی شاره‌که‌ ده‌دات و رایده‌گه‌یه‌نێت، هیچ زیانێکی لێنه‌که‌وتووه‌ته‌وه‌ و به‌رهه‌مهێنان و هه‌نارده‌ی نه‌وتیش به‌رده‌وامه‌.

کۆمپانیای نه‌وتی به‌سره‌ له‌ روونکردنه‌وه‌یه‌کدا بڵاویکردەوە کاتژمێر 3:30 خوله‌کی به‌ره‌به‌یانیی ئه‌مڕۆ دووشه‌ممه‌، چوار مووشه‌ک له‌ سه‌رچاوه‌یێکی نادیاره‌وه‌ ئاڕاسته‌ی کێڵگه‌یێکی نه‌وت له‌ناوچه‌ی نه‌وتی برجسیه‌ کراون، به‌ڵام هیچ زیانێکی گیانی و مادیی لێنه‌که‌وتوه‌ته‌وه‌.

ئاماژەی بەوەش کردووە، له‌لایه‌ن هێزه‌ ئه‌منیه‌کانه‌وه‌ لێکۆڵینه‌وه‌ له‌باره‌ی که‌وتنه‌ خواره‌وه‌ی مووشه‌که‌کان ده‌کرێت.

ئیحسان عه‌بدولجه‌بار، به‌ڕێوه‌به‌ری کۆمپانیای نه‌وتی به‌سره‌ هاوکات، له ‌لێدوانێکی رۆژنامه‌وانیدا رایگه‌یاندووه‌، که‌وتنه‌خواره‌وه‌ی مووشه‌که‌کان کاریگه‌ری له‌سه‌ر به‌رهه‌مهێنان و هه‌نارده‌ی نه‌وت دروست نه‌کردووه‌.

ئه‌وه‌شی ئاشکرا کردووه‌، هه‌نارده‌ی نه‌وتی به‌سره‌ جێگیره‌ و رۆژانه‌ سێ ملیۆن و 400 هه‌زار به‌رمیل نه‌وت هه‌نارده‌ ده‌کات.

کۆدی هەواڵنێر: 60113