به‌پێی هه‌واڵی کوردپرێس، په‌روین بۆڵدان و سزایی ته‌ملی هاوسه‌رۆکانی پارتی دیموکراتیکی گه‌لان شه‌وی ڕابردوو به به‌شداری له به‌رنامه‌ی ته‌له‌فزیۆنیی "سه‌رکرده سیاسییه‌کان له فۆکس" له که‌ناڵی FOX TV، وڵامی پرسیاره‌کانی پێشکه‌شکاری ئه‌و به‌رنامه‌یان دایه‌وه که به‌مه‌به‌ستی هه‌ڵبژاردنی 24ی حوزه‌یرانی 2018 ئاماده کرابوو.
په‌روین بۆڵدان له یه‌که‌مین پرسیاری پێشکه‌شکاری به‌رنامه‌که‌دا که ڕای‌گه‌یاندبوو: ئایا PKK وه‌کوو گرووپێکی تیرۆریستی ده‌زانن به وڵامدانه‌وه‌ی ئه‌و پرسیاره وتی: ده‌بێ واز له‌و پرسه هه‌میشه‌ییانه بێنین. ئێمه له ڕه‌وتی دانوستانی ئاشتی له ناوخۆی شاندی ئیمرالی بووین. ئه‌گه‌ر ئه‌مڕۆش ئاوه‌ها ڕه‌وتێک دروست ببێت جارێکی دیکه تێدا به‌شدار ده‌بین. چوونکه ئێمه خوازیاری ئاشتین. هه‌رچه‌ند ڕه‌خنه‌گران ئه‌وه‌یان به نامه‌به‌ر ناو بردبوو به‌ڵام ئێمه به هه‌مووی ئه‌وانه‌وه سوورین له‌سه‌ر ئاشتی.
ناوبراو له درێژه‌ی وته‌کانیدا له باره‌ی ئه‌گه‌ری ده‌ست‌پێکردنی ڕه‌وتێکی دانوستانی ئاشتیی نوێ له تورکیاش وتی: تا پارتی داد و گه‌شه هه‌بێت ڕه‌وتی دانوستانی ئاشتی به‌ره‌پێش ناڕوات. له سه‌رده‌مێکدا که پارتی دیموکراتیکی گه‌لان ده‌سه‌ڵاتی به‌ده‌سته‌وه بێت ئه‌ڵبه‌ت که ڕه‌وتی ئاشتی ده‌خرێته گه‌ڕ. به‌ڵام تا پارتی داد و گه‌شه هه‌بێت دانوستان و ئاشتی نابێت.
هه‌روه‌ها له‌و به‌رنامه ته‌له‌فزیۆنییه‌دا وڵامه‌که‌ی سه‌لاحه‌دین ده‌میرتاش به‌ربژێری پارتی دیموکراتیکی گه‌لان له هه‌ڵبژاردنی سه‌رۆک کۆماریش خوێندرایه‌وه که ده‌میرتاش له وڵام به پرسیاری په‌یوه‌ندییه‌کانی HDP و PKK و ڕوانگه‌ی ئه‌و حیزبه به توندوتێژی ڕای‌گه‌یاندوووه: ئێره نیشتمانی هه‌موومانه. ئێمه سوورین له سه‌ر سیاسه‌تێکی دیموکراتیکی شارومه‌ندی. دژی چه‌کین ئه‌مه‌ش شتێکی ئاشکرا و به‌رچاوه.
په‌روین بۆڵدان له لێدوانه‌که‌یدا ڕه‌خنه‌ی گرت له مڕاڵ ئاکشنه‌ر و ڕوونیشی کرده‌وه: کاتێک که کوشتنی نادیار له تورکیا ڕووی ده‌دا مڕاڵ ئاکشنه‌ر وه‌زیری ده‌ره‌وه‌ی تورکیا بوو. ئێمه باسی که‌سێک ده‌که‌ین له تاریک ترین سه‌رده‌می تورکیا له کابینه‌ی تورکیا بوو.
کۆدی هه‌واڵنێر: 60104
Your Comment