بەپێی هەواڵی کوردپرێس وەزارەتی بەرگریی ڕووسیا ڕایگەیاند: ئێوارەی ڕۆژی 2018/5/7، کۆپتەرێکی سەر بە ھێزی ئاسمانیی وڵاتەکەیان لە جۆی Ka-52 لە میانی فڕینێکی بەسەر ناوچەکانی رۆژھەڵاتی سووریا، تێکشکاوە و دوو فرۆکەوانەکەشی گیانیان لە دەست داوە.

ئەوەشی ڕاگەیاندووە: تەرمی دوو فرۆکەوانەکە لە لایەن ھێزێکی تایبەتی ڕووسیاوە گەڕێنراونەتەوە بۆ فرۆکەخانەی حەما کە کۆپتەرەکەی لێوە ھەستاوە.

وەزارەتی بەرگریی ڕووسیا ئاماژەی بەوەش کردووە: بە پێی لێکۆڵینەوە سەرەتاییەکان کەوتنی کۆپتەرەکە بەھۆی کێشەی تەکنیکییەوە بووە و لەو ناوچەیە شەڕ ڕووی نەداوە.

ئەمە دووەمین ڕووداوی لەو شێوەیە لە ماوەی ئەم ھەفتەیەدا، رۆژی پێنجشەممەی رابردووش 2018/5/3، فرۆکەیێکی جەنگیی ڕووسیایی لە جۆری (SU-30 SM) لە بنکەی سەربازیی حمێمیم ھەستابوو، پاش دوور کەوتنەوەی بە 20 کیلۆمەتر لە بنکە سەربازییەکە بەسەر دەریای ناوەراستەوە تێکشکا و دوو فرۆکەوانەکەشی تا ئێستا نەدۆزراونەتەوە.