به‌پێی هه‌واڵی کوردپرێس، ئازاد حه‌سه‌ن ئه‌حمه‌د سه‌رۆكی داواكاری گشتیی هه‌رێمی کوردستان له‌باره‌ی هه‌ڵمه‌تی سووكایه‌تی پێكردن به ‌كاندیده‌كان به‌ تایبه‌ت كاندیده‌ ژنه‌كان له ‌ڕاگه‌یێندراوێکدا ڕای‌گه‌یاند: "له ‌ئێستادا له عێراق و كوردستان هه‌ڵمه‌تێكی سووكایه‌تی پێكردن به‌ كاندیده‌كان به‌ گشتی و ژنان به تایبه‌تی له‌سه‌ر گشت لیست و قه‌واره‌كانی به‌شداربووی هه‌ڵبژاردنه‌ په‌رله‌مانییه‌كه‌ی 12ی ئایار ده‌ستی پێكردوووه ‌و كاندیده‌ ژنه‌كان كه‌وتوونه‌ته‌ به‌ر شاڵاوێكی توندی ناو زڕاندن و سووكایه‌تی پێكردن، هه‌ر له ‌دروست كردنی گرته‌ی ڤیدیۆیی ناڕاست كه‌ به ‌شێوه‌ی ناشیاو دروست كراوه‌ و شێوانی وێنه‌كانیان".

داواكاری گشتیی هه‌رێم ئاماژه‌ی به‌وه‌ش داوه‌ "ئه‌مه‌ پێشێلكاری مافه‌كانی مرۆڤه‌ و بێ جیاوازی و به‌پێی مادده‌ی 1 و 2ی یاسای داواكاری گشتی ژماره‌ 159ی هه‌مواركراو ماده‌كانی 433، 434، 438ی سزادانی عێراقی ژماره‌ 111ی ساڵی 1969ی هه‌مواركراو ڕێكاری یاسایی ده‌گرینه‌به‌ر به‌رامبه‌ر هه‌ر كه‌س و لایه‌نێک كه‌ ئه‌م كرده‌وه‌ تاوانییه‌ ئه‌نجام بدات".

سه‌رچاوه‌: شارپرێس

کۆدی هه‌واڵنێر: 60103