به‌پێی هه‌واڵی کوردپرێس، فه‌رمانده‌ی نوێی ناحیه‌ی به‌سیجی سوپای شاری سنه‌ سه‌رله‌به‌یانیی ڕۆژی دووشه‌ممه‌ به‌ ئاماده ‌بوونی فه‌رمانده‌ی سوپای کوردستان، قایمقامی شاری سنه‌ و ژماره‌یێک له‌ به‌رپرسانی سه‌ربازی و ئینتیزامی و به‌رپرسانی حکوومی ده‌ستنیشان کرا.

فه‌ریق محه‌مه‌د حسێن ڕه‌جه‌بی فه‌رمانده‌ی سوپای کوردستان له‌و مه‌ڕاسیمه‌دا وتی: فه‌لسه‌فه‌ی سوپا ئه‌وه‌ی خزمه‌تی هاووڵاتییان بکات و له‌و ڕێبازه‌شدا هه‌نگاوی کاریگه‌ری زۆرمان ناوه‌.

عه‌مید سه‌ید عیسا ڕه‌حیمی فه‌رمانده‌ی پێشووی سوپای سنه‌ له‌و مه‌ڕاسیمه‌دا سپاسی به‌رپرسانی کرد که‌ ماوه‌ی 16 مانگ ئه‌رکی فه‌رمانده‌ییی سوپای سنه‌یان به‌ به‌ڕێزیان سپاردبوو و وتیشی ئه‌و سوپایه‌ به‌ 62 ڕه‌ده‌ و 135 هه‌زار ئه‌ندامی به‌سیجه‌وه‌ گه‌وره‌ترین ناحیه‌ی به‌سیجی پارێزگای کوردستانه‌.

عه‌مید حه‌سه‌ن عه‌سگه‌ری فه‌رمانده‌ی نوێی ناحیه‌ی سنه‌ هیوای سه‌رکه‌وتنی بۆ فه‌رمانده‌ی پێشووی سوپای سنه‌ خواست و وتی: پێشتر بۆ ماوه‌ی ده‌ ساڵ خزمه‌تی ئه‌و خه‌ڵکه‌م کردوووه‌ و له‌گه‌ڵ شاره‌که‌ و خه‌ڵکی شار ئاشنام و داوا له‌ هه‌موو به‌رپرسان و نوخبه‌کان ده‌که‌م له‌م ئه‌رکه‌ نوێیه‌دا یارمه‌تیده‌رم بن.

کۆدی هه‌واڵنێر: 60103