کوردپرێس:

ڕۆژی سێشەممە 31-12-2019 مەسعوود بارزانی سەرۆکی پارتی دیموکراتی کوردستان بەبۆنەی سەری ساڵی تازە پەیامێکی بڵاوکردەوە و سەبارەت بە دۆخی ئێستای عێراق ڕایگەیاند بە نیگەرانییەوە موتابەعەی دۆخی عێراق دەکەن و چەندین ساڵە هۆشداریی ئەوەیان داوە کە ئەگەر دەستوور جێبەجێ نەکرێت عێراق بەرەو هەڵدێر دەڕوات.

مەسعوود بارزانی لە پەیامەکەیدا سەبارەت بە پرۆسەی سیاسیی هەرێمی كوردستان و كاروباری دامودەزگاكانی هەرێمی کوردستانیش رایگەیاند، پشتگیریی بەرنامە و كاری سەرۆكایەتیی هەرێم، پەرلەمان و حكوومەتی هەرێمی کوردستان دەكەین بۆ بەڕێوەبردن و چەسپاندنی چاكسازیی كە داواكاریی خەڵكی كوردستان و زۆربەی لایەنە سیاسییەكانە.

دەقی پەیامەکەی مەسعوود بارزانی بەبۆنەی سەری ساڵی نوێی زایینی

بەناوی خودای مەزن و دلۆڤان

بەبۆنەی سەری ساڵی تازەی زایینی گەرمترین پیرۆزبایی لە هاووڵاتییانی خۆشەویستی كوردستان دەكەم. پیرۆزبایی لە خانەوادەی سەربەرزی شەهیدان و پێشمەرگە قارەمانەكان دەكەم و هیوای خێر و خۆشیان بۆ دەخوازم. لەو بۆنەیەدا بە پێویستی دەزانم سوپاسی خۆڕاگری و قوربانیدانی گەلی كوردستان بكەم كە لە قۆناغە جۆراوجۆرەكاندا بە ڕووی تەحەددیاتدا وەستاون و سەختی و زەحمەتیی زۆریان بینیوە.

سوپاس بۆ خودای گەورە و گیانفیداییی پێشمەرگە و خۆڕاگریی خەڵك، ئێستا هەرێمی كوردستان بە ئاراستەی بووژانەوە و چاكسازی و سەقامگیری هەنگاو دەنێت. بە لەبەرچاوگرتنی ئەو بارودۆخە نالەبارەی كە لە عێراقدا هەیە ئێمە هەمیشە خوازیاری چارەسەربوونی كێشەكان و ژیانێكی سەربەرزانە بۆ تێكڕای خەڵكی عێراق بووینە و لە ساڵانی ڕابردوودا زۆرجار هۆشداریی ئەوەمان داوە كە عێراق بەرەو هەڵدێڕ دەڕوات و جەختمان لەوە كردووەتەوە ئەگەر بنەماكانی حوكمێكی مەدەنی و دەستوور جێبەجێ نەكرێن عێراق تووشی چارەنووسێكی نادیار دەبێت.

ئێستایش بە نیگەرانییێكی زۆرەوە موتابەعەی گرژی و ڕووداو و پێشهاتەكانی ئەو دواییەی عێراق دەكەین. لەو بڕوایەداین كە نابێ لایەنە عێراقییەكان ڕێگە بدەن وڵاتەكەیان ببێتە گۆڕەپانی یەکلایی­کردنەوەی گرفت و ململانێ و بەرژەوەندییەكانی خەڵكی تر. هەروەها بە هەموو شێوەیێک پشتگیریی داوا ڕەواكانی خۆپێشاندەران و گەڕانەوەی سەقامگیری و ڕاستەڕێبوونی پڕۆسەی سیاسیی عێراق دەكەین و لەگەڵ هەر گۆڕانكارییێک-داین و یارمەتیدەری هەر ڕێگەیێک دەبین كە ببێتە هۆی چارەسەربوونی كێشەكان و بەدیهاتنی دادپەروەری و داواكارییەكانی خەڵك. لەگەڵ هەموو ئەوەیشدا هەر هەوڵێك ڕەت دەكەینەوە كە ببێتە هۆی پاشەكشەی دیموكراسی یان ئەوەی ماف و دەستكەوتی پێكهاتەكان و گەلی كوردستان بخاتە ژێر هەڕەشەوە. چوونكە هۆكاری سەرەكیی گرفتەكانی عێراق پێشێلكردنی دەستوور و ئیدارەدانی هەڵە و تاكڕۆیی بووە نەك ماف و دەستكەوتەكانی گەلی كوردستان و پێكهاتەكان.

لەبارەی پڕۆسەی سیاسیی هەرێمی كوردستان و كاروباری دامودەزگاكانی هەرێم، پشتگیریی بەرنامە و كاری سەرۆكایەتیی هەرێم و پارلەمان و حكوومەتی هەرێم دەكەین بۆ بەڕێوەبردن و، چەسپاندنی چاكسازیی كە داواكاریی خەڵكی كوردستان و زۆربەی لایەنە سیاسییەكانە. هەروەها جەختیش لە پتەوتركردنی بنەماكانی پێكەوەژیان و قووڵتركردنی ئەو فەرهەنگە بەرزەی گەلەكەمان دەكەینەوە كە بووەتە هۆی تەبایی و ئاشتی و برایەتی نێوان پێكهاتە ئایینی و نەتەوەییەكانی گەلی كوردستان و ئەم پێكەوەژیانە وەك گلێنەی چاومان دەپارێزین.

لە كۆتاییدا ئومێدی ئەوە دەخوازم ساڵی تازە ساڵی خۆشی و بەختەوەری بێت بۆ هەموو هاووڵاتییانی كوردستان و عێراق و ئاشتیی گشتگیر لە ناوچەكەمان و جیهاندا بێتە دی.

مسعوود بارزانی

31ـی 12ـی 2019