کوردپرێس:

گۆنای گۆبیلای وتەبێژی پارتی دیموکراتیکی گەلانی تورکیا لە لێدوانێکدا ڕەخنەی لە سیاسەتەکانی حکومڕانیی تورکیا گرت و ڕایگەیاند دەسەڵاتی پارتی دادوگەشەپێدان و پارتی بزاڤی نەتەوەپەرەستی تورکیا لە ئیدلیبی سووریا پشتگیریی گرووپە سەلەفی و جیهادییە توندڕەوەکان دەکات و ناوچەکە بەرەو شەڕێکی گەورەتر دەبەن.

وتەبێژی HDP زیادیشی کرد دەسەڵاتی سیاسیی تورکیا بە خۆیا دەنازێت کە ڕێککەوتنی ئەستانەیان کردووە بەڵام ئێستا هەموو تیۆرییەکانیان بۆ مانەوە لە سووریا خەریکە شکست دەهێنێت و دەڕووخێت.

ناوبراو دووپاتی کردەوە کە پشتگیری کردنی تورکیا لە گرووپە توندڕەوە جیهادییەکان و ناچارکردنی خەڵکی ئاوارە بە ڕووکردن لە ناوچە سەرێکانی و عەفرین و سپاردنیان بە دەست میلیشیا توندڕەو و جیهادییەکان تاوانێکی گەورەیە و داوا لە دەسەڵاتدارانی تورکیا دەکەم تووشی ئەم تاوانە نەبن.