کوردپرێس:
حکوومەتی هەرێمی کوردستان نیگه‌رانیی خۆی لەبارەی بۆردوومانەکانی ناوچە سنوورییەکان گه‌یاندووه‌ته تورکیا و رایدەگەیێنێت، قبووڵ ناكەین و رێگه نادەین خاكه‌كه‌مان بۆ هێرشكردنه سه‌ر و تێكدانى ئاسایشى وڵاتانى دراوسێ به‌كار بهێنرێت و به‌و هۆیه‌وه ژیانى هاووڵاتییانى هه‌رێمى كوردستان بكه‌وێته مه‌ترسییه‌وه.
دەقی ڕاگەیێندراوەکەی حکوومه‌تی هه‌رێم:
حكوومه‌تى هه‌رێمى كوردستان دڵگرانى و نیگه‌رانیى قووڵى خۆى بۆ كه‌وتنه‌وه‌ى قوربانیانى سڤیل له ئه‌نجامى بۆمبارانى ناوچه سنوورییه‌كان له‌گه‌ڵ توركیا ده‌رده‌بڕێت و سه‌ره‌خۆشی له خانه‌واده و که‌سوکاریان ده‌کات.
هه‌بوونى چه‌كدارانى په‌كه‌كه له‌و ناوچانه و نزیكبوونه‌وه و هاتنى به‌ئه‌نقه‌ستیان بۆ ناو گوند و ئاواییه‌كان، بێباكانه ژیانى گوندنشینانى ئه‌و ناوچانه‌ى خستووه‌ته مه‌ترسییه‌وه، هه‌روه‌ها بووه‌ته ڕێگر له گه‌ڕانه‌وه‌ى ژیان و ئاوه‌دانكردنه‌وه‌یان.
حكوومه‌تى هه‌رێمى كوردستان قبووڵ ناكات و ڕێگه نادات خاكه‌كه‌ى بۆ هێرشكردنه‌سه‌ر و تێكدانى ئاسایشى وڵاتانى دراوسێ به‌كار بهێنرێت و به‌و هۆیه‌وه ژیانى هاووڵاتیانى هه‌رێمى كوردستان بكه‌وێته مه‌ترسییه‌وه.
ناوچه گوندنشینه‌كانى سنوور ده‌بێ نه‌كرێنه مه‌یدانى پێكدادانى سه‌ربازى و بۆمباران، چه‌كدارانى په‌كه‌كه‌ش ده‌بێ له گوندنشینان دووركه‌ونه‌وه و نه‌یانخه‌نه مه‌ترسییه‌وه.
حکوومه‌تی هه‌رێمی کوردستان ده‌رباره‌ی ڕووداو و بۆمبارانه‌کانی چه‌ند ڕۆژی ڕابردووی ناوچه سنوورییه‌کان، نیگه‌رانیی خۆی گه‌یاندووه‌ته تورکیا و داواکارین دووباره نه‌بنه‌وه.
Your Comment