ئاری جەلال سەرپەرشتیاری فیدراسیۆنی پەنابەران لە هەرێم لە دیمانەیێک لەگەڵ هەواڵنێری کوردپرێسدا ئاماژەی بە ژمارەی ئەو هاووڵاتییانە دا کە لە عێراق چوونەتە دەرەوە و داوای مافی پەنابەرییان لە وڵاتانی دیکە کردووە.

ئاری جەلال لەو بارەیەوە بە هەواڵنێری کوردپرێسی ڕاگەیاند لە ساڵی 2015وە تا 2019 203 هاووڵاتیی عێراقی گیانی خۆیانیان لە ڕێگەی کۆچبەریدا لە دەست داوە و 166 کەسیش بێسەروشوێن بوون.

سەرپەرشتیاری فیدراسیۆنی پەنابەران لە هەرێم گوتیشی: مافی پەنابەریی سیاسی لە وڵاتانی دیکە هاووڵاتییانی کەمتر لە 18 ساڵ ناگرێتەوە و بەوەشەوە بەگوێرەی ئەو ئامارانەی لایەنە پێوەندیدارەکان بڵاویان کردۆتەوە لە ماوەی 5 ساڵی ڕابردوودا 594 هەزار و 499 هاووڵاتیی عێراقی داوای مافی پەنابەرییان لە 32 وڵاتی جیهان کردووە.

ئاری جەلال زیادیشی کرد: ئاماری پەنابەران لە 2014 بۆ 2018 لە هەڵکشاندا بووە و لە ساڵی 2019وە ڕووی کردۆتەوە دابەزین.

سەرپەرشتیاری فیدراسیۆنی پەنابەران لە هەرێم لە کۆتاییدا ڕوونی کردەوە کە زۆرینەی پەنابەرە عێراقییەکان ڕوویان لە وڵاتی ئەڵمانیا کردووە و داوای مافی پەنابەرییان لەو وڵاتە کردووە و لە ماوەی 5 ساڵی ڕابردوودا داواکاریی 178 هەزار و 80 هاووڵاتیی عێراقی لە ئەڵمانیا تۆمار کراوە.