به‌پێی هه‌واڵی کوردپرێس، ڕۆژی سێشه‌ممه 9ی نیسانی 2019 شاکر جبووری به‌ڕێوه‌به‌ری گشتیی ده‌روازه سنوورییه‌کانی عێراق ڕای‌گه‌یاند که به شێوه‌ی فه‌رمی مه‌رزی سه‌یرانبه‌نی بانه کراوه‌ته‌وه به مه‌به‌ستی په‌ره‌پێدانی ئاڵوگۆڕی بازرگانی و ئاسانکاری بۆ هاتوچۆی موسافیر له نێوان هه‌ر دوو وڵاتدا.
ناوبراو گوتیشی: به مه‌به‌ستی به‌نێوده‌وڵه‌تی مه‌رزه‌که زیاتر له 25 دۆنم زه‌وی بۆ ڕووبه‌ری مه‌رزه‌که ڕاده‌ستی داموده‌زگا په‌یوه‌ندیداره‌کان کراوه و به‌پێی دوایین ڕاپۆرته‌کان ئه‌م ده‌روازه یه‌کێکی دیکه له ده‌روازه فه‌رمییه‌کانی نێوان عێراق و ئێران ده‌بێت.
ئه‌و به‌رپرسه عێراقییه ئاماژه‌ی به هه‌ندێک ده‌روازه له هه‌رێمی کوردستان کرد که هێشتا پڕۆسه‌ی به‌نێوده‌وڵه‌تی‌کردنیان به‌رده‌وامه و ڕاشی‌گه‌یاند: ده‌وڵه‌تی فیدڕاڵ هیچ جۆره بڕیارێکی له‌سه‌ر داخستنی سنووره نافه‌رمییه‌کانی نێوان عێراق و ئێران نه‌گرتۆته‌به‌ر.
ئه‌مه‌ش له حاڵێکدایه که به کردنه‌وه‌ی فه‌رمیی ده‌روازه‌ی سه‌یرانبه‌ن له نێوان شاره‌کانی بانه له پارێزگای کوردستانی ئێران و پێنجوێن له پارێزگای سلێمانی، عێراق ئێستاکه چوار ده‌روازه‌ی فه‌رمی له‌گه‌ڵ ئێراندا هه‌یه.
سه‌رچاوه: گه‌لگامیش پرێس
کۆدی هه‌واڵنێر: 60103
Your Comment