کوردپرێس:

ئەمڕۆ ئایەتوڵڵا خامنەئی ڕێبەری باڵای کۆماری ئیسلامیی ئێران لە میانی وتەیێكدا باسی لە بڕیارەكەی ئەمریكا كرد سەبارەت بە ناساندنی سوپای پاسداران وەك رێكخراوێكی تیرۆریستی و رایگەیاند ئەمریكا و دوژمنەكانی ئێران لە ماوەی 40 ساڵی رابردوودا ئەوەی لە دەستیان هاتووە ئەنجامیان داوە، بەڵام نەیانتوانیوە هیچ كارێكی بێمێشكانە دژی ئێران ئەنجام بدەن.

ئایەتوڵڵا خامنەیی لەو بڕوایەشدا بوو كە ئەمریكا و نەیارانی ئێران بەرەو لەناوچوون دەچن.

رابەری باڵای ئێران جەختیشی كردەوە لەوەی سوپای پاسداران دەستپێشخەر بووە لە بەرەنگاربوونەوەی دوژمنانی وڵاتی ئێران و وتیشی: "هۆكاری دوژمنایەتیی ئەمریكا بۆ پاسداران بۆ ئەوە دەگەڕێتەوە كە بەرگری لە ئێران و شۆڕشەكەی كردووە و سوپای پاسداران لە رووی سەربازی و سیاسییەوە بەرەنگاری دوژمنان دەبێتەوە".

جێی ئاماژەیە رۆژی دووشەممە ئەمریكا سوپای پاسدارانی خستە نێو لیستی تیرۆرەوە و ئێرانیش لە بەرامبەردا بڕیاری دا هێزەكانی ئەمریكا لە رۆژئاوای ئاسیا بخاتە لیستی تیرۆر.