بەپێی هەواڵی کوردپرێس، هەواڵی کشانەوەی ئەمریکا لە سووریا ڕەخنەی توندی بەرپرسانی باڵای سەربازیی و سیاسیی ئەمریکا و کوردەکانی سووریای لێکەوتەوە، تەنانەت ژمارەیێک لە بەرپرسانی ئەمریکا بۆ ڕاگەیاندنی ناڕەزایی خۆیان بەو بڕیارەی دۆناڵد ترەمپ دەستیان لەکار کشایەوە.

ژمارەیێک لە بەرپرسانی بەریتانیا-ش ئەمڕۆ بە ڕۆژنامەی تلێگراف-ی ئەو وڵاتەیان وتووە بڕیاری ئەمریکا بۆ کشانەوە لە سووریا و چۆڵ کردنی پشتی کوردەکان بڕیارێکی نادروست بوو و پاشهاتی خراپی لێدەکەوێتەوە.

باب سیلی، کۆمیتەی هاوبەشی سیاسەتی دەرەوە و هاوسەرۆکی گرووپی دۆستیی پەرلەمانی سووریا بە تلێگرافی وتووە: بڕیارەکەی ترەمپ بڕیارێکی سەیر بوو و پیشاندەری شارەزا نەبوونی ناوبراو لەم بابەتەدایە.

باب سیلی جەختی کردەوە ئەمریکا و بەریتانیا و فەڕانسا قەرزداری گیانفیدایی کوردەکانن لە شەڕی داعش و ئەبێت یارمەتییان بدەن تا جارێکی تر لە لایەن داعش و دژبەرانیانەوە نەکرێنە ئامانج.

ژمارەیێک لە بەرپرسانی دیکەی بەریتانیا جەخت دەکەنەوە کە شەڕی داعش کۆتایی پێنەهاتووە و کشانەوەی ئەمریکا لە سووریا ئەوان هەمبەر داعش لاواز دەکات.

کۆدی هەواڵنێر: 60113