به‌پێی هه‌واڵی کوردپرێس، دواى ئه‌وه‌ى ڕۆژی شه‌ممه‌ 22ی کانوونی یه‌که‌می 2018 ته‌رمی د. جه‌مال نه‌به‌ز له‌ ڕێگه‌ی فڕۆکه‌خانه‌ی نێوده‌وڵه‌تیی هه‌ولێره‌وه‌ گه‌یشته‌وه‌ هه‌رێمی کوردستان و دواتر به‌ره‌و شاری سلێمانی به‌ڕێکرا، له‌ ڕێوره‌سمێکدا به‌ ئاماده‌بوونى پارێزگارى سلێمانى و ژماره‌یێک که‌سایه‌تى و بنه‌ماڵه‌ى کۆچکردوو له‌ گۆڕستانی گردی شێخ مارف به‌خاکسپێردرا.

له‌ ڕێوڕه‌سمه‌که‌دا ده‌وه‌ن مه‌عرووف وتاری بنه‌ماڵه‌ی پرۆفیسۆر دکتۆر جه‌مال نه‌به‌زی خوێنده‌وه ‌و سوپاسى سه‌رۆکوه‌زیران و هه‌ر دوو پارێزگاری هه‌ولێر و سلێمانی کرد که‌ له‌و خه‌مه‌دا له‌گه‌ڵ ئه‌وان به‌شدار بوون.

شایانی باسه‌؛ ڕۆژی 08-12-2018 پرۆفیسۆر د. جه‌مال نه‌به‌ز نووسه‌ر و بیرمه‌ندی نێوداری كورد له‌ ته‌مه‌نی 85 ساڵیدا به‌هۆی نه‌خۆشی له‌ نه‌خۆشخانه‌یێكی به‌رلینی پایته‌ختی ئه‌ڵمانیا كۆچی دوایی كرد.

پڕۆفیسۆر د. جه‌مال نه‌به‌ز له‌ ساڵی 1933دا له‌ شاری سلێمانی له‌دایک بوووه‌ و له‌ سه‌ره‌تای خوێندنیدا جگه‌ له‌ خوێندنی ئیسلامی، فه‌لسه‌فه‌ و ده‌روونزانی و فیزیا و ماتماتکی خوێندوووه‌ و خاوه‌نی چه‌ندین به‌رهه‌می نووسین و وه‌رگێڕانه.

هه‌روه‌ها له‌ نیوه‌ی یه‌که‌می په‌نجاکانی سه‌ده‌ی ڕابردوودا له‌ زانکۆی به‌غدا له‌ به‌شی فیزیا و ماتماتیکی خوێندوووه‌ و دواتر له‌ شاره‌کانی که‌رکووک، هه‌ولێر، به‌غدا و به‌سره‌ وانه‌ی وتوووه‌ته‌وه‌.

دوای 28 ساڵ ژیان چوووه‌ته‌ ئه‌ورووپا بۆ ته‌واوکردنی خوێندن و پاشان له‌ زانکۆکانی مینوخ و ئۆزبورگ خوێندنی ئیسلامی و ئێرانناسی و شێوازی گوتنه‌وه‌ی وانه‌ی خوێندوووه‌.

له ‌ساڵی 1967-1970 له‌ زانکۆی هامبۆرگ خوێندوویه‌تی و هه‌ر له‌و ساڵانه‌دا له‌گه‌ڵ چه‌ند هاوڕێیێکی یه‌کێتیی نه‌ته‌وه‌ییی خوێندکارانی کوردیان دامه‌زراندوووه‌.

له‌ ساڵی 1970-1979 له‌ زانکۆی به‌رلینی ئازاد زانسته‌ سیاسییه‌کان و ڕۆژنامه‌نووسی و یاسای خوێندوووه و هه‌روه‌ها یه‌کێکه‌ له‌ دامه‌زرێنه‌رانی کاژیک.

کۆدی هه‌واڵنێر: 60103