به‌پێی هه‌واڵی کوردپرێس، ڕۆژی یه‌کشه‌ممه 1ی ته‌مووز ئارێز عه‌بدوڵڵا سه‌رۆكی فراكسیۆنی یه‌كێتی له ئه‌نجومه‌نی نوێنه‌رانی عێراق له پرێس كۆنفرانسێكدا له شاری هه‌ولێر ڕای‌گه‌یاند: له چوار ساڵی ڕابرددوودا كێشه‌ی گه‌وره له عێراقدا دروست بوو له‌وانه شه‌ڕی داعش دواتر بابه‌تی ڕیفراندۆم كێشه‌كانی قووڵتر كرده‌وه و به‌هانه‌ی دایه ده‌ست حه‌شدی شه‌عبی و هێزه عیراقییه‌كان كه به‌شێک له ناوچه دابڕاوه‌كان به زه‌بری هێز داگیر بكه‌نه‌وه.
ناوبراو وتیشی: "دۆزیه‌كان تا ئێستا برینیان وه‌ک خۆیه‌تی، مه‌ینه‌تی كاكه‌ییه‌كانیشی هاتۆته سه‌ر و ڕۆژانه تاقمه تیرۆریستییه‌كان و داعش و شۆڤێنیه‌كان به ناوی داعشه‌وه په‌لاماریان ده‌ده‌ن و وه‌ک یه‌كێتیش له‌و بارودۆخه بێده‌نگ نابین".
ئارێز عه‌بدوڵڵا جه‌ختی له‌وه‌ش كرده‌وه بۆ قۆناغی داهاتوو پێویسته لایه‌نه‌كان به‌ره‌یێک یان هاوپه‌یمانێتییێک له به‌غدا دروست بكه‌ن و به یه‌ک تیم دانووستان بكه‌ن و حكوومه‌تی هه‌رێمیش په‌یوه‌ندی و هه‌ماهه‌نگی له‌گه‌ڵ فراكسیۆنه كوردستانییه‌كان هه‌بێت.
سه‌رچاوه: ڕادیۆ نه‌وا
کۆدی هه‌واڵنێر: 60103
Your Comment