«قەدری جان» ئەندامی پارتی دیموکراتی کوردستانی سووریا و هەروەها ئەندامی ئەنجومەنی نیشتمانیی کورد (ENKS) لە قامیشلۆ ئاماژەی دا بە سەردانی جێگری نوێنەری ئەمریکا بۆ کاروباری سووریا و ڕایگەیاند: لە سەرەتای مانگی زاینیی داهاتووەوە خولێکی نوێی دانوستانی نێوان لایەنە کوردییەکانی کوردستانی سووریا واتا ئەنجومەنی نیشتمانیی کورد و حزبەکانی یەکێتیی نیشتمانیی کورد دەست پێدەکاتەوە.
ناوبراو ئاماژەی دا بە سەدانی ئەم دواییەی مایکل ڕۆبین جێگری نوێنەری ئەمریکا بۆ کاروباری سووریا و وتی: شاندەکەی ئەمریکا لە سەردانەکەیاندا بۆ کوردستانی سووریا لەگەڵ دوو لایەنەکەدا کۆ بوونەوە. ئیرادەیێکی دیپلۆماتیک لە ناوچەکەدا هەیە کە بەنیازی چارەسەر کردنی کێشەکانی سووریادایە.
قەدری جان ڕاشیگەیاند: بڕیاریشە ئەمڕۆ شاندێکی فەڕەنسی و پاشان شاندێکی ئەمریکی کۆبوونەوەیێک لەگەڵ ئەنجومەنی نیشتمانیی کورد لەبارەی گۆڕانکارییەکان لە سووریا و دۆخی کورد، بەڕێوە ببەن.
ناوبراو جەختی لەوەش کردەوە: هیوادارین لایەنی بەرامبەرمان جیدی بێت لە گەیشتن بە یەکگرتنی ڕەوتە کوردییەکان.
کۆدی هەواڵنێر: 60113
Your Comment