به‌پێی هه‌واڵی کوردپرێس، ئه‌و مامۆستا ناڕازییانه ڕایان‌گه‌یاندوووه ئه‌گه‌ر به‌غدا مووچه نه‌نێرێت، ناڕه‌زایه‌تییه‌كان به میكانیزمێكی جیاواز ده‌ست‌پێده‌كه‌نه‌وه.
عوسمان گوڵپی، ئه‌ندامی ئه‌نجومه‌نی مامۆستایانی ناڕازی، بهSNNی ڕاگه‌یاند: دوای كۆتایی هاتنی تاقیكردنهوهكانی وه‌رزی یه‌كه‌می خوێندكاران، كه رۆژی 15ی جانیڤێریی 2018 كۆتایی دێت، مامۆستایانی ناڕازی كۆبوونه‌وه‌یێكی فراوان ئه‌نجام ده‌ده‌ن و بڕیاری كۆتایی ده‌ده‌ین له باره‌ی ده‌وام كردن یان بایكۆت كردن یاخود ده‌ست‌پێكردنه‌وه‌ی ناڕه‌زایه‌تییه‌كان.
ناوبراو وتیشی: "ناڕه‌زایه‌تییه‌كانی ئه‌مجاره‌مان به میكانیزم و پلانێكی تایبه‌ت و جیاوازه‌وه به‌ڕێوه ده‌چێت و ئه‌و هه‌ڵانه‌ی كه پێشتر كراون دووباره ناكرێته‌وه، بۆ ئه‌وه‌ی به‌لاڕێدا نه‌برێت".
به وته‌ی عوسمان گوڵپی ئه‌گه‌ر تا ئه‌و كاته حكوومه‌تی عێراق مووچه‌ی وه‌زاره‌تی په‌روه‌رده نه‌نێرێت، ناڕه‌زایه‌تییه‌كانی مامۆستایان ده‌ست‌پێده‌كاته‌وه و بایكۆت كردنیش یه‌كێكه له ئه‌گه‌ره‌كانی به‌رده‌م مامۆستایان.
ئه‌و مامۆستا ناڕازییه هۆشداری ده‌دات و ڕای‌ده‌گه‌یێنێت: "ئه‌گه‌ر مووچه له به‌غداوه نه‌نێردرێت، ئه‌وه دۆخی كه‌رتی په‌روه‌رده وێرانتر ده‌بێت و خوێندنی ئه‌مساڵ له ساڵی ڕابردوو خراپتر ده‌بێت. ئه‌وه‌شی كه وای له‌مامۆستایان كردوووه بێده‌نگی هه‌ڵبژێرن، ئه‌وه‌یه كه تائێستا ئومێدێكیان به ناردنی مووچه‌كانیان له لایه‌ن حكوومه‌تی عێراقه‌وه هه‌یه".
کۆدی هه‌واڵنێر: 60104
Your Comment