بەپێی هەواڵی کوردپرێس، "جمعە محمد" شرۆڤەکاری پرسە سیاسییەکان و ڕۆژنامەنووسی کورد لە گفتوگۆ لەگەڵ کوردپرێسدا ئاماژەی دا بە ئەگەری هێرشێکی دیکەی سوپای تورکیا بۆسەر باکووری سووریا و وتی: هەر لەسەرەتای قەیرانی سووریاوە تورکیا بەدوای جێبەجێ کردنی سیاسەتی پاوانخوازانە و داگیرکارانەی خۆی بووە و کەڵک لە هەموو ئامێرێک وەردەگرێت بۆ سەرکەوتنی ئەو سیاسەتە.

ناوبراو وتیشی: تورکیا بە بیانووی جۆراوجۆرەوە لەوان ئاسایشی نەتەوەیی دەیهەوێت کرۆیدری سنووری باکووری سووریا داگیر بکات و لەم چوارچێوەیەشدا عەفرین و ترابلۆس و گرێسپی و سەرێکانیی داگیر کرد.

ناوبراو درێژەی دا: تورکیا دەرفەتەکە بۆ هێرش کردن گونجاو دەبینێت و لەم ماوەیەشدا هەڕەشەی زارەکیی زیاتر کردووە. لە بەرامبەردا ئێمە خۆمان بۆ بەرگری کردن لە وڵاتەکەمان ئامادە کردووە و هێزەکانمان لە چەند ناوچە لەوان تەلڕەفعەت و کۆبانێ و مەنبج کۆ بوونەتەوە.

جومعە محەمەد وتیشی: بیست ڕۆژە کە تورکیا هەڕەشەی هێرش کردن دەکات بەڵام تائەو کاتەی گڵۆپی سەوزی ئەمریکا و ڕووسیا بەدەست نەهێنێت توانای هێرش کردنی نییە.

ئەم ڕۆژنامەنووسە ئاشکرای کرد: تورکیا چەند کێشەی لەگەڵ ئەمریکا لەسەر ئیس-400، فڕۆکەی جەنگیی ئیف-35 و ئیف-16 هەیە و لەلایەکی دیکەشەوە لەگەڵ ڕووسیا لەسەر ئیدلیب و ڕێگای ئیم4 ناکۆکە. بۆ ئەردۆغان سەخت نییە کە مل کەچ بکات و پا بە بەرژەوەندییەکانیدا بنێت تاکوو مۆڵەتی هێرش کردن بۆسەر کوردستانی سووریا بەدەست بهێنێت بەڵام تا ئەم کاتەش نەیتوانیوە.

شرۆڤەکاری پرسە سیاسییەکان وتیشی: ئەمڕۆ بڕیار وایە لەچوارچێوەی لوتکەی 20دا ئەردۆغان و بایدن کۆ ببنەوە و ئەردۆغان داوای مۆڵەتی هێرش کردن لە بایدن بکات بەڵام بەبڕوای ژمارەیەکی زۆر لە شرۆڤەکاران بایدن ئەو مۆڵەتە بە تورکیا نادات.

ناوبراو وتیشی: خەڵکیش لە هەڵمەتەکانی تورکیا ناڕازی و تووڕەن و خەڵکی ئەم ناوچەیە تورکیا وەکوو وڵاتێکی داگیرکەر دەناسن چوونکە تورکیا هێرش دەکاتە سەر هەر ناوچەیەک، دانیشتووانی ڕاستەقینەی ناوچەکە دەردەکات و کەسان و بنەماڵەی تیرۆریستان لەو ناوچانەدا جێگیر دەکات.

جومعە محەمەد ڕاشیگەیاند: ئیدارەی خۆسەر بۆ چارەسەر کردنی کێشەکان هەمیشە بەدوای گفتوگۆ و ڕێگاچارەی ئاشتیخوازانەدا بووە لەگەڵ هەموو لایەنەکان و هەوڵ دەدات پەیوەندیی خۆی لەگەڵ لایەنەکانی دیکە نەپچڕێنێت.