بەپێی هەواڵی کوردپرێس، سەرۆکی پارتی گەلی کۆماری وتی: ئەوە لەسەر منە داوای لێبووردن لە هەرکەسێک بکەم لەم سەکۆیەوە قسەی کردبێت و هەرکەسێک بە قسەکانیان تووڕە بووبێت، جارێکی تر پیرۆزبایی جەژنی نەورۆز لە هەموو برا کوردەکانم دەکەم، هەروەها سڵاو لە سەلاحەدین دەمیرتاش دەکەم.

قسەکانی ئۆزێل، دوای ئەوە دێت، تونجەر باکرهان هاوسەرۆکی دەم پارتی و وەفدێکی پارتەکە، سەردانێکی هاودەنگییان بۆ گەورە شارەوانی ئەستەنبووڵ ئەنجامداوە، دوای دەستگیرکردنی ئەکرەم ئیمامئۆغڵو، سەرۆکی شارەوانی ئەستەنبووڵ.

باکرهان، لە کۆنگرەیێکی رۆژنامەوانی هاوبەشی لەگەڵ ئۆزگور ئۆزێل، سەرۆکی پارتی گەلی کۆماری رایگەیاند، هەڵوێستمان روونە، لە هەر شوێنێک نادادپەروەری و بێ یاسایی هەبێت، لە هەر شوێنێک مافی کرێکارێک، ستەملێکراوێک، ژنێک، کوردێک یان تورکێک پێشێل بکرێت، ئێمە بە هاودەنگی لەوێین.

هەر لە کۆنگرە رۆژنامەوانیەکەدا، لەوەڵامی پرسیاری ڕۆژنامەنووسێک لەبارەی لەبارەی قسەکانی مەنسوور یاڤاش، سەرۆکی شارەوانی ئەنقەرە و سەرکردەی پارتی گەلی کۆماری، کە هێرشی کردە سەر نەورۆز و ئاڵای کوردستان، ئۆزگور ئۆزێل وتی: پەیامی حیزب لەسەر ئەم بابەتە ئەو پەیامەیە کە لە دەمی سەرکردەی پارتەکەوە دەدرێت.

مەنسوور یاڤاش لە میانی وتەیێکدا لە ئیستەنبووڵ، ڕایگەیاند، لەکاتێکدا پۆلیس پەشمەکی بەخشی بەو کەسانەی کە چوونە ئەو گردبوونەوەیەی کە بۆ نەورۆز رێکخراو ئاڵای پەڕۆی تیادا هەڵدەدرا چاوەڕێی ئەوە دەکەین پەشمەکەیش بەسەر ئەو گەنجانەدا دابەش بکەن کە خۆپیشاندان دژی دەستیگرکردنی ئەکرەم ئیمام ئۆغلۆ دەکەن.