ڕێککەوتننامەی ٢٥ ساڵەی نێوان دمشق و کۆمپانیای ئەمریکی "ئێچ کەی ئێن" (HKN) لەسەر حەوت کێڵگەی نەوتیی ڕمێلان، تەنیا گرێبەستێکی ئابووری نییە؛ بەڵکو وەک بەشێک لە پرۆسەی تێکەڵکردنەوەی هێواشهێواشی ناوچەکانی ژێر کۆنترۆڵی هێزەکانی سووریای دیموکرات (هەسەدە) لەناو پێکهاتەی حکوومەتی ناوەندیی سووریادا سەیر دەکرێت.
تایبەتکردنی ٨٪ لە داهاتی کێڵگە نەوتییەکانی "ڕمێلان" بۆ کۆمپانیایەکی سەر بە هێزەکانی سووریای دیموکرات (هەسەدە)، سەرلەنوێ گفتوگۆکانی لەسەر سنووری ڕاستەقینەی تێکەڵبوونی هێزە کوردییەکان لەناو حکوومەتی سووریا و ئایندەی (لامەرکەزییەت) لە باکوور و ڕۆژهەڵاتی ئەم وڵاتە بردووەتە قۆناغێکی نوێوە.
