سەعید نەورەسی کەسایەتییەکی تەنها ئاینی نەبوو، بەڵکو وەکو بەشێک لە پرسی مێژووی کوردان سەیر دەکرێت؛ پرسێک کە تێیدا ناسنامە، پەروەردە و فێرکاری، یەکێتی و ئەگەری مانەوە بەیەکەوە گرێ دراون. نەورەسی ڕەگی قەیرانی کوردانی نەوەک تەنها لە گوشاری دەرەکی، بەڵکوو لە ناخ و ناوەوەی کۆمەڵگە و لە سێگۆشەی هەژاری، نەزانی و دووبەرەکیدا دەبینی، و لەم دیدگایەشەوە پەروەردەی دەکردە گرنگترین ئامرازی بونیادنانەوەی کۆمەڵایەتی و نیشتمانی. بەم هۆیەوە، ئامۆژگارییە بەناوبانگەکەی «بخوێننەوە، بخوێننەوە، بخوێننەوە» لەم گێڕانەوەیەدا دروشمێکی ئەخلاقیی سادە نییە، بەڵکوو پوختەی تێڕوانینێکی ستراتیژییە بۆ ڕزگارکردنی کورد لە پەشۆکاوی، داڕمانی مێژوویی و لاوازیی هۆشیاریی گشتی.
