بەڕێوەبەری گشتیی بەڕێوەبەرایەتیی گەشەپێدانی کۆمەڵایەتی لە پارێزگای کوردستان، هۆشداری دا لە پەرەسەندنی زیانە کۆمەڵایەتییەکان لەم پارێزگایەدا و ڕایگەیاند: کوردستان کە ساڵانێکی زۆر بەهۆی هاوپێوەندیی خێزانی، کلتووری خۆماڵی و سامانی کۆمەڵایەتییەوە، یەکێک لە پارێزگا هەرە بێ زیانەکانی وڵات بوو، ئەمڕۆش لە زۆرێک لە پارێزگاکان دۆخی باشترە، بەڵام زیادبوونی کێشە کۆمەڵایەتییەکان، تەشەنەسەندنی ئاڵوودەبوون بە ماددە هۆشبەرەکان، ناکۆکیی خێزانی، خۆکوشتن و کەمبوونەوەی بەرگەی کۆمەڵایەتی، زەنگێکی مەترسیداری جدییە بۆ داهاتووی پارێزگاکە؛ بابەتێک کە بە وتەی ئەو، بەبێ بەشداریی سەرجەم دامودەزگاکان و خەڵک، کۆنترۆڵ ناکرێت.
دوو کچی تەمەن ٧ و ١٥ ساڵان کە لەلایەن باوک و باوەژنەکەیانەوە ڕووبەڕووی توندوتیژی و ئەشکەنجەیەکی دڕندانە ببوونەوە و لە ناو ماڵدا بەند کرابوون، بەهۆی هۆشیاریی خەڵک و کاردانەوەی بەپەلەی فریاکەوتنی کۆمەڵایەتی (ئۆرژانس) ڕزگار کران و هۆکارانی ئەم تاوانەش دەستگیر کران.
