لە دوای دووبارەبوونەوەی بانگەشەکانی دۆناڵد ترامپ سەبارەت بە "پارەدار کردنی کوردەکان لە بەرامبەر شەڕدا"، جەبار یاوەر، ئەمینداری پێشووی وەزارەتی پێشمەرگە، لە گفتوگۆیەکدا لەگەڵ کوردپرێس، وێڕای ڕەخنەی توند لە بچووککردنەوەی خەباتی ستراتیژیی گەلی کورد بۆ ئاستی مامەڵەی دارایی، داوای هەڵوێستی فەرمی و ڕوونی حکوومەتی هەرێمی کوردستانی کرد. ناوبراو ئاماژەی کرد بە ئاماری وردی ١٨١٠ شەهید و زیاتر لە ١٠ هەزار بریندار لە شەڕی دژی داعش، جەختی کردەوە کە پێشمەرگە بۆ ئاسایشی جیهانی جەنگاوە، نەک بۆ پارەیەکی کەم و بێبایەخ. یاوەر لە پێشنیازێکی بێوێنەدا، داوای لە وەزارەتی پێشمەرگە کرد بۆ کۆتاییهێنان بەم قسە و باسە سووکایەتیپێکردنانە، وەرگرتنی هاوکارییە داراییە سنووردارەکانی هاوپەیمانان ڕابگرێت، تا بسەلمێندرێت خوێنی پێشمەرگە بە هیچ بڕە پارەیەک مامەڵەی پێوە ناکرێت.
