کوردپرێس:

دەمەوبەیانی ڕۆژی شەمە 21ی بەفرانباری 1398 بەرانبەر بە 11ی کانوونی دووهەمی 2020 ئەرکانی هێزی چەکداری ئێران لە بەیانێکی فەرمیدا ڕایگەیاند فڕۆکەی گەشتیاریی ئوکراین لە جۆری بویینگ 737 کە کاتژمێر 6 و 18 خولەکی بەیانی لە نزیک فڕۆکەخانەی ئیمام خومەینی لە تاران کەوتە خوارەوە بە مووشەکی سوپای پاسداران کەوتۆتە خوارەوە.

لە بەیاننامەکەی ئەرکانی هێزی چەکداری ئێراندا وێڕای سەرەخۆشی کردن و داوای لێبوردن، نووسراوە لەو شەوەدا هێزەچەکدارەکانی ئێران خرابوویە ئامادەباشیی تەواو و ئامادەی هەموو جۆرە بەرپەچدانەوەیێک بوو بۆ هێرشێکی چاوەڕواننەکراوی ئەمریکا. لەم کاتە هەستیارەدا فڕۆکە گەشتیارییەکە لە بنکەی سەربازیی سوپای پاسداران نزیک دەبێتەوە و ئەم ڕووداوە بە هۆی هەڵەیێکی ئینسانییەوە ڕوودەدات.

شایانی باسە ڕۆژی ڕابردوو شاندێکی کانادا گەیشتە تاران و ئێرانیش بە فەرمی ڕایگەیاند کە ئامادەیە بە شاندێکی هاوبەشی ئێران و کەنەدایی سندووقە ڕەشەکەی ئەو فڕۆکە گەشتیارییەی ئوکراین تاوتوێ بکات و ئەنجامە فەرمییەکە هەرچی بوو ڕایبگەیەنێت.