کوردپرێس: هۆشەنگ محەممەد، بەڕێوەبەری گشتیی ناوەندی هاوبەشی هەماهەنگیی قەیرانەکان بە تۆڕی میدیایی رووداوی راگەیاندووە: "هاتنی پەنابەران لە کوردستانی سووریاوە بۆ هەرێمی کوردستان بەردەوامە. لە ماوەی 24 کاژێری رابردوودا 25 کەسی دیکە لە باکووری سووریا گەیشتنە هەرێمی کوردستان".

هۆشەنگ محەممەد، باسیشی لەوە کردووە "بەهۆی لێکەوتەکانی شەڕەوە بەگشتی تاوەکوو ئێستا 19 هەزار و 18 پەنابەری کوردستانی سووریا گەیشتوونەتە هەرێمی کوردستان، كە لەنێویاندا ژن و منداڵ و کەسانی بەتەمەن هەن".

هاتنی پەنابەرانی کوردستانی سووریا دوای کشانەوەی هێزەکانی ئەمریکا و دەستپێکردنی هێرشی سوپای تورکیا و سوپای نیشتمانیی سووریای نزیک لە تورکیا بۆ باکووری سووریا لە 9-10-2019 دێت. یەکەم کاروانی پەنابەرانی کوردستانی سووریاش لە 14-10-2019وە گەیشتنە هەرێمی کوردستان.

کۆدی هەواڵنێر: 60113