کوردپرێس:
عەلی شەمخانی سکرتێری ئەنجومەنی باڵای ئاسایشی نیشتمانیی ئێران لە لێدوانکێدا ئاماژەی بە کشانەوەی دۆناڵد ترەمپی سەرۆکی ئەمریکا لە ڕێککەوتنی ئەتۆمیی نێوان ئێران و وڵاتانی 5 کۆ یەک کرد و ڕایگەیاند پاش ئەو کشانەوەیە وڵاتانی ئەورووپی بەڵێنیان دا کە ناهێڵن ئەو ڕێککەوتنە بڕووخێت و هەوڵ دەدەن بەرژەوەندییەکانی ئێران لەو ڕێککەوتنەدا زامن بکەن.
شەمخانی ڕەخنەی لە چۆنیەتیی مامەڵەکردنی ئەورووپییەکان لەگەڵ ڕێککەوتنەکە کرد و گوتیشی: پاش کشانەوەی ئەمریکا سێ وڵاتی بەریتانیا و ئەڵمانیا و فەڕەنسا بەڵێنی زامن کردنی بەرژەوەندییەکانی ئێرانیان دا بەڵام جگە لە هەڵوێست وەرگرتنی زارەکی نەبێت بە کرداری هیچیان نەکرد بۆیە ئێران یەک ساڵ ددانی بە خۆدا گرت و پاشان دەستی کرد بە کەم کردنەوەی پێبەندبوونی بە ڕێککەوتنەکە و لە چوار قۆناغی جیاجیادا ئەو هەنگاوانەی خستە بواری جێبەجێکردنەوە.
سکرتێری ئەنجومەنی باڵای ئاسایشی نیشتمانیی ئێران زیادیشی کرد یەکەم وڵات کە دەستی بە کشانەوە و کەم کردنەوەی پێبەندبوونی بە ڕێککەوتنەکە کرد ئەمریکا بوو چوونکە پێبەندبوونی ئەمریکا بە نووسراوە لە ڕێککەوتنەکەدا بەڵێنی لەسەر دراوە و پاشان بڕیارنامەی 2231ی ئەنجومەنی ئاسایشی نیشتمانیی نەتەوەیەکگرتووەکان جەختی لە سەر ئەو بابەتە کردۆتەوە.
شەمخانی ئاماژەی بە وردەکاریی هەنگاوی پێنجەمی ئێران نەکرد بەڵام پێشتریش بەرپرسی ئاژانسی ئەتۆمیی ئێران و سەرۆککۆماری ئێران و وەزیری دەرەوەی ئەو وڵاتەش ئاماژەیان بە هەڵگرتنی هەنگاوی سێهەم کردبوو ئەگەر بێتوو ئەورووپییەکان بە کرداری هەوڵ بۆ پارێزگاری کردن لە بەرژەوەندییەکانی ئێران نەدەن.
Your Comment