کوردپرێس:

ڕۆژی یەکشەمە 15ی کانوونی یەکەمی 2019 کە تەنها یەک ڕۆژ بە دەستەوە ماوە لە ماوەی دەستووری بۆ ڕاسپاردنی کەسێک بۆ پێکهێنانی حکوومەت، بەرهەم ساڵح سەرۆککۆماری عێراق لە نووسراوێکدا داوای لە محەمەد حەلبووسی سەرۆکی پەرلەمانی عێراق کردووە ناوی گەورەترین فراکسیۆنی ئەنجومەنی نوێنەران دیاری بکات بۆ ناونانی پاڵێوراوی سەرۆکایەتیی وەزیران.

بەرهەم ساڵح لە نامەکەیدا بۆ محەمەد حەلبووسیی نووسیوە: بە مەبەستی ڕاسپاردنی کاندیدێکی نوێ بۆ پێکهێنانی حکوومەت ناوی گەورەترین فراکسیۆنی خاوەن زیاترین ژمارەمان لە دانیشتنی یەکەمی ئەنجومەنی نوێنەران پێبدەن.

شایانی باسە ڕۆژی 4ی ئەم مانگە داوای دەستلەکارکێشانەوەی عادل عەبدولمەهدی لە پۆستی سەرۆکایەتیی وەزیرانی عێراق گەیشتە نووسینگەی سەرۆکایەتیی کۆمار و بەو پێیەش سەرۆککۆماری عێراق ماوەی 15 ڕۆژی بەدەستەوەیە بۆ ئەوەی کەسێک ڕابسپێرێت بۆ پێکهێنانی حکوومەت.