چیا حه‌سه‌ن‌زاده سه‌رۆکی ده‌سته‌ی پاورلفتینگی مه‌هاباد به هه‌واڵنێری کوردپرێسی ڕاگه‌یاند: له کێبه‌رکێی پرێسی سینگدا، تیمی گه‌وره‌ساڵانی ئه‌و شاره 9 میداڵیای ڕه‌نگامه‌ی له تیری ته‌مه‌نی گه‌وره‌ساڵاندا وه‌ده‌ست هێنا.
ناوبراو جه‌ختی کرده‌وه: تیمی شاری مه‌هاباد وه‌کوو نوێنه‌ری پارێزگای ئازه‌ربایجانی ڕۆژئاوا له کێبه‌رکێی پرێسی سینگی پاڵه‌وانێتیی وڵاتدا به‌شداری کرد و 5 میداڵیای زێڕ و 4 میداڵیای بڕۆنزی مسۆگه‌ر کرد و بۆ یه‌که‌مین جار پله‌ی دوهه‌می ئه‌و کێبه‌رکێیانه‌ی وه‌ده‌ست هێنا.
حه‌سه‌ن‌زاده وتیشی: ڕۆژانی 29ی سه‌رماوه‌ز تاکوو 2ی مانگی به‌فرانبار کێبه‌رکێی پاڵه‌وانێتیی پرێسی سینگی وڵات به میواندارێتیی شاری ورمێ و به ئاماده‌بوونی 270 وه‌رزشوانه‌وه به‌ڕێوه چوو.
سه‌رۆکی ده‌سته‌ی پاورلفتینگی مه‌هاباد ڕاشی‌گه‌یاند: سه‌عید مووسه‌وی، حه‌مید که‌ره‌می، داوود خزری‌نیا، سیاوه‌ش ئیسحاقی و ڕه‌حیم جه‌باری میداڵیای زێڕ و یه‌حیا مووسه‌وی، مادح پیری، سینا خالند و موحسن ئه‌حمه‌دی میداڵیای بڕۆنزیان مسۆگه‌ر کرد.
کۆدی هه‌واڵنێر: 60103
Your Comment