به‌پێی هه‌واڵی کوردپرێس، کیفاح مه‌حموود به ماڵپه‌ڕی هه‌واڵی "بغداد الیوم"ی وتوووه: سه‌رۆک وه‌زیرانی عێراق له وتاره‌که‌ی خۆیدا ئاماژه‌ی به هێزی پێشمه‌رگه نه‌کرد که ئه‌وه‌ش بێگومان به ئه‌نقه‌ست بووه.
ناوبراو زیادی ده‌کات: مه‌عقوول نییه له وتاره‌که‌ی عه‌بادیدا ناوی حه‌شدی شه‌عبی بهێندرێت که له‌م دواییه‌دا به چه‌ند هه‌زار هێزی خۆبه‌خشه‌وه دامه‌زراوه به‌ڵام هێزێکی گه‌وره‌ی وه‌کوو پێشمه‌رگه که 70 ساڵه دامه‌زراوه و خه‌باتی دژ به ڕژێمی دیکتاتۆری کردووه و ده‌وری گرینگی له ڕووخانی سه‌دامدا بووه ئاماژه‌ی پێ نه‌کرێت.
کیفاح مه‌حموود سه‌باره‌ت به ده‌روازه سنوورییه‌کانی هه‌رێمی کوردستانیش گوتی: له ساڵی 2005ه‌وه تا ئێستا ده‌وڵه‌تی فیدڕاڵی عێراق له گومرگه‌کانی کوردستان و به تایبه‌ت له کاروباری په‌ساپۆرتدا نوێنه‌ریان له ده‌روازه سنوورییه‌کان هه‌بووه به‌ڵام ئیداره کردنی ده‌روازه‌کان به شێوازی هاوبه‌ش پێویستی به‌وه‌یه یاسا و په‌یڕه‌وێکی گونجاوی بۆ دابڕێژرێت ئه‌وه‌ش له ڕێگای هاوکاریی نێوان به‌غدا- هه‌ولێر.
کۆدی هه‌واڵنێر: 60103
Your Comment