به‌پێی هه‌واڵی کوردپرێس، ڕه‌جه‌ب ته‌ییب ئهردۆغان سه‌رۆک­کۆماری تورکیا ڕه‌خنه‌ی له به‌رده‌وامبوونی پاڵپشتی و یارمه‌تیی سه‌ربازی و لۆجستیکی ئه‌مریکا بۆ یه‌کینه‌کانی پاراستنی گه‌ل (YPG) گرت که تورکیا به باڵی سووریی پارتی کرێکارانی کوردستانی ده‌زانێت.
ئهردۆغان له کۆبوونه‌وه‌ی حه‌فتانه‌ی نوێنه‌ره‌کانی پارتی داد و گه‌شه له په‌رله‌مانی تورکیا وتی: بۆچی ئه‌م لۆرییه چه‌ک و ته‌قه‌مه‌نییانه ده‌نێردرێنه باکووری سووریا؟ ئه‌و چه‌کانه بۆ به‌ره‌نگاربوونه‌وه دژ به کام وڵات ئاماده ده‌که‌ن؟ دیاره ئه‌نگێزه‌یێکی تر هۆکاری ئه‌م یارمه‌تییانه‌یه و ئێمه‌ش هه‌ر به‌و پێیه هه‌نگاو هه‌ڵده‌گرین.
ڕۆژی ڕابردوو کاروانێکی نوێ بریتی له 65 لۆری هه‌ڵگری یارمه‌تیی سه‌ربازی به چه‌ک و ته‌قه‌مه‌نییه‌وه له لایه‌ن ئه‌مریکاوه گه‌یشته شاری حه‌سه‌که و ئه‌وه‌ش تووڕه‌یی به‌رپرسانی تورکیای لێکه‌وته‌وه. چوونکه تورکیا چاوه‌ڕوانی ئه‌وه‌ی ده‌کرد پاش کۆتاییی ئۆپه‌راسیۆنی ڕه‌قه ناردنی یارمه‌تیی سه‌ربازیی ئه‌مریکا بۆ یه‌په‌گه ڕابگیرێت.
ئهردۆغان له درێژه‌ی لێدوانه‌که‌یدا زیادی کرد: نابێت که‌س چاوه‌ڕوانی ئه‌وه بکات تورکیا له به‌رانبه‌ر ئه‌م سێناریۆیه‌دا بۆ داهاتووی ناوچه‌که بێده‌نگ دابنیشێت و هیچ نه‌کات.
سه‌رچاوه: حوڕییه‌ت
کۆدی هه‌واڵنێر: 60104
Your Comment