به‌پێی هه‌واڵی کوردپرێس، سه‌میح یاڵچین جێگری پارتی بزاڤی نه‌ته‌وه‌په‌ره‌ستی تورکیا (MHP) په‌یامێکی له هه‌ژماری تایبه‌تی خۆی له توویته‌ر بڵاو کرده‌وه و ڕای‌گه‌یاند که بینای ته‌شکیلاتی حیزبه‌که‌یان له پارێزگای کوردنشینی شڕناخ کراوه‌ته ئامانج.
جێگری مه‌هه‌په ڕای‌گه‌یاند: به گوێره‌ی ئه‌و زانیارییانه‌ی ده‌ستمان که‌وتووه بینای ته‌شکیلاتی مه‌هه‌په له پارێزگای کوردنشینی شڕناخ کراوه‌ته ئامانج و شوکر بۆ خودا که له‌م هێرشه چه‌کدارانه‌دا زیان به که‌سێک نه‌گه‌یشتووه.
یاڵچین گوتیشی: "هێرشه چه‌کدارییه‌که دوای کردنه‌ئامانجی هێزه تایبه‌ته‌کانی پۆلیسی تورکیا له ئه‌ده‌نه ئه‌نجام دراوه و ئاشکرایه که هێرشێکی به‌رنامه‌ڕێژکراو بووه به‌ڵام جۆری هێرشه‌که ده‌ریده‌خات که زۆر سه‌ره‌تایی و ته‌نها هه‌ڵمه‌تێکی پیلانداڕێژراو بووه."
شایانی باسه؛ ڕۆژی چوارشه‌ممه 25ی ئه‌یلوولی 2019 به‌هۆی ته‌قینه‌وه‌ی بۆمب له‌سه‌ر ڕێگای هێزی تایبه‌تی پۆلیسی تورکیا له پارێزگای ئه‌ده‌نه پێنج که‌س له‌وان هێزێکی تایبه‌تی پۆلیس بریندار بوو.
سه‌رچاوه: ڕۆژنامه‌ی دیوار
کۆدی هه‌واڵنێر: 60103
Your Comment