بەپێی هەواڵی کوردپرێس ڕۆژی هەینی 22ی خەرمانانی 1398 بەرانبەر بە 13ی ئەیلوولی 2019 محەمەد جەواد زەریف لە پەیامێکی تویتەریدا ئاماژەی بە هەواڵی سیخوڕی کردنی ئیسرائیل لە ئەمریکا کردووە و بە تەشەرەوە بە ترەمپی وتووە تا نەتانیاهووت ببێ دوژمنت بۆ چیە.

وەزیری دەرەوەی ئێران توانجی لە ئیدارەی ترەمپ داوە و لە تویتەر نووسیویەتی: "بەڕێز ترەمپ! گورزێکی تریشت لە تیمی بی خوارد! ئەمریکا کە براردەرە گیانی گیانییەکەی ئەندامێکی تیمی بی بێت و سیخوڕی لە سەرۆککۆماری ئەمریکا بکات ئیتر چ پێویستی بە دوژمن هەیە؟!"

شایانی باسە ئاژانسی بلومبێرگ لە هەواڵێکدا ڕایگەیاند نەتانیاهوو سەرۆکوەزیرانی ڕژێمی زایۆنی ئامێری سیخوڕیی لە سەر ژمارەیێک مۆبایل لە دەوروبەری کۆشکی سپی و شوێنە گشتی و گرینگەکانی واشەنتن داناوە بۆ سیخوڕی کردن. ئەگەرچی نەتانیاهوو ئەو ئیدعایەی ڕەت کردەوە بەڵام هەواڵنێرەکەی بلوومبێرگ گوتوویەتی بەڵگە و داتای قایمی لای کە ئەو سیخوڕییەی ئیسرائیل دەسەلمێنێت.