کوردپرێس:
كۆمپانیایێكی ته‌كنه‌لۆجیا له پیرۆ لاپتۆپێكی ناوازه و جیاوازی دروست كرد كه پێكهاته‌ی ده‌ره‌وه‌ی له دار دروست كردووه و له‌جیاتی شه‌حنكردنه‌وه‌یشی به كاره‌با ده‌توانرێ به تیشكی خۆر شه‌حن بكرێته‌وه و دیزاینه‌ره‌كه‌یشی باس له‌وه ده‌کات که ماوه‌ی 15 ساڵ خه‌ریكی ئه‌و بیرۆكه‌یه‌ی بووه و دواجار توانیویه‌تی سه‌ركه‌وتوو بێ و لاپتۆپه‌كه دروست بكات.
كۆمپانیاكان كێبه‌ركێیانه له‌سه‌ر خستنه‌ڕووی به‌رهه‌می جیاوازتر و هه‌رزانتری ته‌كنه‌لۆجیا و كۆمپیوته‌ر و تابڵێت و لاپتۆپ و مۆبایله زیره‌كه‌كان، له ده‌سپێشخه‌رییه‌كی نوێش كۆمپانیایێكی وڵاتی پیرۆ كه به یه‌كێک له وڵاته دواكه‌وتووه‌كانیش داده‌نرێ، لاپتۆپێكی له دار دروستكراو و به تیشكی خۆر شه‌حنكردنه‌وه‌ی به‌رهه‌م هێنا.
لاپتۆپه‌كه له‌لایه‌ن كۆمپانیای خانه‌واده‌ی كاراسكۆس به‌رهه‌م هێنراوه كه تایبه‌تن به بواری كۆمپیوته‌ر و ته‌كنه‌لۆجیا و ناوی لاپتۆپه نوێكه‌یشیان كردووه به لاپتۆپی "واوا" كه ڕووكاری ده‌ره‌وه‌ی به دار داپۆشراوه و به ئاسانی ده‌توانرێ هه‌ركات شكا یان گۆڕانكاری به‌سه‌ردا هات ڕووی ده‌ره‌وه‌ی لێ بكرێته‌وه و دانه‌یێكی‌تری بۆ دابنرێ و نوێ بكرێته‌وه.
لاپتۆپه‌كه به ته‌واوی ته‌نكه و كێشێكی كه‌می هه‌یه و به سووكترین لاپتۆپ له ڕووی كێشه‌وه هه‌ژمار ده‌كرێ كه تا ئێستا به‌رهه‌م هێنرابێ، لاپتۆپه‌كان به‌هۆی قورسیی كێشیانه‌وه زۆر جار بوونه‌ته كێشه بۆ خاوه‌نه‌كانیان چوونكه له كاتی گه‌شت و ڕۆیشتن بۆ شوێنه جیا جیاكان ده‌بووه بارێكی گران به سه‌ر شانیانه‌وه.
هه‌رزانی نرخه‌كه‌ی هێنده‌ی‌تر هه‌وادارانی لاپتۆپی سه‌رسام كردووه كه نرخه‌كه‌ی ته‌نیا 235 دۆلاری ئه‌مه‌ریكییه و تایبه‌تمه‌ندیی شه‌حنكردنه‌وه‌یشی له ڕێی تیشكی خۆر یه‌كێكه له خواستی ئه‌و كه‌سانه‌ی كه له ده‌ره‌وه و له‌و شوێنانه‌ی وزه‌ی كاره‌بایان ده‌ست ناكه‌وێ لاپتۆپ به كار ده‌هێنن.
کۆدی هه‌واڵنێر: 60103
Your Comment