کوردپرێس:

به‌گوێره‌ی راگه‌یاندراوێكی وه‌زاره‌تی نه‌وتی عیراق، گرێبه‌ستێكیان له‌گه‌ڵ كۆمپانیای سترۆی ترانس غاز ئۆیل-ی ڕووسیا مۆر كردووه‌ بۆ دۆزینه‌وه‌ی نه‌وت له‌ناوچه‌یێكی سنووری پارێزگای ئه‌نبار.

راگه‌یاندراوه‌كه‌ ئاشكرای كردووه‌، گرێبسه‌ته‌كه‌ بۆماوه‌ی 34 ساڵه‌و له‌و ماوه‌یه‌دا كۆمپانیا ڕووسییه‌كه‌ سه‌رگه‌رمی كاری پشكنین و دۆزینه‌وه‌ی نه‌وت ده‌بێت له‌و كێڵگه‌یه‌، كه‌ ماوه‌یه‌كه‌ دۆزراوه‌ته‌وه‌و ناونراوه‌ ناوچه‌ی 17، رووبه‌ره‌كه‌شی 12 هه‌زار كیلۆمه‌تر چوارگۆشه‌ ده‌بێت.

له‌وباره‌یه‌وه‌، سامر غه‌زبان، وه‌زیری نه‌وتی عیراق رایگه‌یاندووه‌: به‌گوێره‌ی زانیارییه‌ سه‌ره‌تاییه‌كان، قه‌باره‌ی یه‌ده‌گی نه‌وت له‌و ئه‌و كێڵگه‌یه‌، له‌نێوان (2 - 4) ملیار به‌رمیل ده‌بێت، له‌گه‌ڵ بڕێكی زۆر غازی سروشتی.

به‌گوێره‌ی راگه‌یاندراوه‌كه‌ی وه‌زاره‌تی نه‌وت، ئه‌و 34 ساڵه‌ی له‌ گرێبه‌سته‌كه‌دا هاتووه‌، كۆمپانیا روسییه‌كه‌ له‌ 9 ساڵی یه‌كه‌مدا سه‌رگه‌رمی كاری پشكنین و دۆزینه‌وه‌ی نه‌وت ده‌بێت و 25 ساڵیش ته‌رخان ده‌كات بۆ به‌رهه‌مهێنان و گه‌شه‌پێدانی كێڵگه‌كانی نه‌وت.