کوردپرێس:
ئێواره‌ی ڕۆژی چوارشه‌ممه 4ی ئه‌یلوولی 2019 له مه‌راسیمێکدا به ئاماده‌بوونی شۆڕش ئیسماعیل وه‌زیری پێشمه‌رگه‌ی حکوومه‌تی هه‌رێمی کوردستان و ویلیام نیکۆلاس کۆزایین کونسووڵی گشتیی شانشینی هۆڵه‌ندا له هه‌رێم یاداشتی لێکتێگه‌یشتن بۆ به‌شداری و پێکه‌وه‌یی له "پرسی چاکسازی" له نێوان وه‌زاره‌تی پێشمه‌رگه و هۆڵه‌ندا واژۆ کرا.
له‌و مه‌راسیمه‌دا که بریکاری وه‌زاره‌ت و ژماره‌یێک ئه‌فسه‌ری پله‌باڵا ئاماده‌ی بوون، وه‌زیری پێشمه‌رگه ئه‌و هه‌نگاوه‌ی حکوومه‌تی هۆڵه‌ندای به گرنگ و کاریگه‌ر وه‌سف کرد، هه‌روه‌ک ستایشی ئه‌رک و ڕۆڵی ڕاوێژکاران و هێزه‌کانی هۆڵه‌ندای له مه‌شق و ڕاهێنانی پێشمه‌رگه کرد له ڕابردوودا.
به‌ر له ئیمزاکردنی ڕێککه‌وتنه‌که کونسووڵی گشتیی هۆڵه‌ندا دووپاتی کرده‌وه که به‌پێی ناوه‌ڕۆکی یاداشته‌که، ڕاوێژکارانی سه‌ربازی و مه‌ده‌نی وڵاتانی ئه‌مریکا، به‌ریتانیا، ئه‌ڵمانیاش له پڕۆسه‌ی چاکسازی به‌شدار ده‌بن و له ڕێگای ئه‌م هه‌وڵه‌وه ڕێگاکان کورتتر ده‌بنه‌وه و هه‌نگاوه‌کانیش له هه‌مبه‌ر پڕۆسه‌ی چاکسازیدا خێراتر ده‌بن.
له کۆتاییی مه‌راسیمه‌که‌دا هه‌ردوولا هاوڕا بوون له‌سه‌ر پته‌وکردنی زیاتری په‌یوه‌ندییه‌کان به ئاراسته‌ی گه‌یشتن به ئامانجه سه‌ره‌کییه‌که که پڕۆسه‌ی چاکسازیی ڕاسته‌قینه‌یه.
سه‌رچاوه: خه‌ندان
کۆدی هه‌واڵنێر: 60103
Your Comment