به‌پێی هه‌واڵی کوردپرێس، شۆڕش ئیسماعیل وه‌زیری پێشمه‌رگه‌ی هه‌رێمی کوردستان له‌گه‌ڵ وه‌فدێكی كوونسووڵگه‌ری وڵاتی هه‌نگاریا و ئۆفیسی سه‌ربازیی ئه‌و وڵاته به سه‌رۆکایه‌تیی میكلۆش سابۆ جێگری سه‌ركونسووڵی هه‌نگاریا له هه‌ولێر کۆ بوویه‌وه و له دیداره‌که‌دا وه‌زیری پێشمه‌رگه ستایشی هه‌وڵ و ماندووبوونی فه‌رمانده‌ی پێشووی هێزه‌كانی هه‌نگاریای له هه‌رێم كرد و به‌خێرهاتنی فه‌رمانده‌ی نوێی ئه‌و هێزه‌ی له هه‌رێم كرد.
ناوبراو وتیشی: ئێمه به شانازییه‌وه یادتان ده‌كه‌ینه‌وه، له مێژووی خۆماندا تۆماری ده‌كه‌ین كه ڕۆژانێكی سه‌خت ئێوه هاوكارمان بوون و وه‌ک دۆستی هه‌میشه‌یی ئێمه ده‌مێننه‌وه و بوونی ئێوه و هاوپه‌یمانان له ئێستادا جێی بایه‌خی زۆری ئێمه‌یه، له كاتێكدا تیرۆریستانی داعش خه‌ریكی خۆڕێكخستنه‌وه‌ن و له ڕێگه‌ی جموجووڵی شاراوه‌وه به‌رنامه‌یان داڕشتووه بۆ ڕووبه‌ڕووبونه‌وه‌ی هه‌موو مرۆڤایه‌تی.
هه‌ر له کۆبوونه‌وه‌که‌دا سه‌رۆكی شانده‌كه به وه‌زیری پێشمه‌رگه‌ی ڕاگه‌یاند که ئــه‌ركی (تۆماس كیش ڤاری) به‌ڕێوه‌به‌ری ئۆفیسی سه‌ربازی له هه‌رێم كۆتایی هات و (ژۆڵت ڤارگا) وه‌ک به‌ڕێوه‌به‌ری نوێی ئۆفیسی په‌یوه‌ندیی سه‌ربازی له كونسووڵگه‌ری هه‌نگاریا ده‌ست به‌كار ده‌بێت.
له كۆتاییی كۆبوونه‌وه‌كه‌شدا هه‌ردوولا کۆک بوون له‌سه‌ر پته‌وكردنی زیاتری په‌یوه‌ندییه‌كان و به‌رده‌وامیی مه‌شق و ڕاهێنان به هێزه‌كانی پێشمه‌رگه.
سه‌رچاوه: شارپرێس
کۆدی هه‌واڵنێر: 60103
Your Comment