به‌پێی هه‌واڵی کوردپرێس، کۆمیته‌ی ناوه‌ندیی پارتی کرێکارانی کوردستان (PKK) ڕای­گه‌یاندووه: کۆبوونه‌وه‌ی ساڵانه‌ی ئه‌و پارته‌ی به‌ڕێوه بردووه و داوای له تێکڕای خه‌ڵک و ئه‌ندامانی پارته‌که کردووه له هه‌موو بواره‌کاندا خۆیان ڕێک بخه‌نه‌وه و له هه‌موو گۆڕه‌پانه‌کاندا له پێناو سه‌رکه‌وتنی ڕێبازی عه‌بدوڵڵا ئۆجه‌لان هه‌وڵ بده‌ن و خه‌بات بکه‌ن.
ته‌وه‌ری سه‌ره‌کیی کۆبوونه‌وه‌که سه‌باره‌ت بووه به فشاره‌کانی ئه‌م دواییه‌ی تورکیا و شه‌ڕی ئه‌و وڵاته دژ به ئۆجه‌لان و PKK و له‌م باره‌شه‌وه هه‌ڵسه‌نگاندنی جیاواز کراوه. کۆبوونه‌وه‌که ڕاشی­گه‌یاندووه داپه‌ڕه ڕه‌گه‌زپه‌رستانه‌کانی ده‌وڵه‌تی تورکیا به‌و واتایه‌ن ئه‌و وڵاته له بواری چاره‌سه‌ری کێشه‌ی کورد شکستی هێناوه و حکوومه‌ته‌که‌ی له هه‌ڵدێری ڕووخاندایه.
هه‌روه‌ها ئاماژه‌ش کراوه به ڕزگار بوونی ڕه‌قه له بنده‌ستی تیرۆریسته‌کانی داعش و باس له‌وه کراوه: ئه‌م سه‌رکه‌وتنه مێژووییه له خه‌ڵکی سووریا و به‌تایبه‌ت کوردستانی سووریا پیرۆزبایی ده‌که‌ین و جه‌خت ده‌که‌ینه‌وه برایه‌تیی کورد و عه‌ره‌ب له‌سه‌ر بنه‌مای برایه‌تیی نێوان هه‌موو گه‌ل بۆ کۆتایی هێنان به پاوانخوازیی ده‌وڵه‌ت- گه‌ل له ناوچه‌که‌دا و سه‌رکه‌وتنی ڕاپه‌ڕینی دیموکراتیک له ڕۆژهه‌ڵاتی ناوه‌ڕاست ڕۆڵێکی سه‌ره‌کی ده‌بینێت.
پرسی کوردستانی عێراق له دیکه‌ی ته‌وه‌ره‌کانی کۆبوونه‌وه‌که بوو، له‌م باره‌وه خراوه‌ته‌ڕوو: بێگومان ئه‌م پرسه یه‌کێکه له پرسه سه‌ره‌کییه‌کانی ئه‌م کۆبوونه‌وه‌یه. هێرشی ئه‌م دواییه بۆ سه‌ر کوردستانی عێراق پیلانی بۆ داڕێژرا بوو و له‌م ناوه‌دا ڕۆڵی تورکیا ته‌واو ئاشکرایه. گه‌یشتینه ئه‌و ئامانجه‌ی ڕه‌وت و ڕێبازی ده‌وڵه‌ت خوازی و نه‌ته‌وه‌په‌ره‌ستی که ڕه‌وتی پارتی دیموکراتی کوردستانه به ته‌واوی ڕووی له له‌ناوچوونه و ڕێبازی کۆنفیدراڵیزمی دیموکراتیک و خۆبه‌ڕێوه‌به‌ریی دیموکراتیک سه‌ر ده‌که‌وێت. هه‌ر بۆیه‌ش PKK له کوردستانی عێراقدا ڕۆڵی ڕێبه‌رایه‌تی ده‌بینێت.
سه‌رچاوه: فورات نیووز
کۆدی هه‌واڵنێر: 60104
Your Comment