به‌پێی هه‌واڵی کوردپرێس، مه‌وله‌وی عه‌بدولحه‌مید ئیسماعیل زه‌هی پاش وه‌رگرتنی وڵامی نامه‌که‌ی له‌ لایه‌ن نووسینگه‌ی ڕێبه‌ری باڵای شۆڕشه‌وه‌ به‌ مه‌به‌ستی ده‌ستخۆشی کردن له‌ وڵامی بێ په‌رده‌ و حه‌کیمانه‌یان نامه‌یێکی بۆ ئه‌وان ناردووه‌.

مه‌وله‌وی ئیسماعیل زه‌هی له‌ به‌شێک له‌و نامه‌یه‌دا بۆ ڕێبه‌ری باڵای شۆڕشی ئیسلامی نووسیویه‌تی: فه‌رمانی مێژوویی، حه‌کیمانه‌ و بڕیاری کۆتاییی ڕێبه‌ری باڵای شۆڕش له‌ دۆخی هه‌ستۆکی ناوچه‌که‌ و وڵات که‌ له‌ نامه‌یێکدا له‌ لایه‌ن سه‌رۆکی نووسینگه‌ی ئه‌و ڕێبه‌ره‌ باڵایه‌وە له‌ وڵام به‌ نامه‌ی به‌نده‌ ڕاگه‌یێندراوه‌، نائومێدکه‌ری نه‌یارانی ئێرانی ئیسلامی و مایه‌ی خۆشحاڵیی گه‌لی به‌ڕێزی ئێران و له‌ چاکه‌ی به‌رده‌وامی ڕێبه‌ری باڵای شۆڕشه‌ و ده‌بێته‌ هۆی یه‌کڕیزیی نه‌ته‌وه‌یی و ئاسایشی سه‌قامگیر.

له‌ به‌شێکی دیکه‌ له‌و نامه‌یه‌دا هاتووه‌: ئه‌و فه‌رمانه‌، ئه‌رکی شه‌رعی و یاساییی هه‌موو به‌رپرسانی له‌شکه‌ری و وڵاتی و بنه‌ماکانی نیزامی ئیسلامی له‌ پێناو جێبه‌جێ کردنی عەداڵه‌ت و شێوازی ڕوانینی یه‌کسانی بۆ هه‌موو ئیتنیک و ئایینزاکانی ڕوون کردووه‌ته‌وه‌ و دوا بڕیاری داوه‌.

مه‌وله‌وی ئیسماعیل زه‌هی له‌و نامه‌یه‌دا ڕێز داناوه‌ بۆ فه‌رمانه‌که‌ی ڕێبه‌ری دڵسۆزی شۆڕشی ئیسلامی و هیوای خواستووه‌ که‌ "به‌ڕێوه‌به‌رانی وڵات له‌ ئاسته‌ جۆربه‌جۆره‌کاندا ئه‌و په‌یامه‌ ڕووناک و خوداپه‌سندانه‌یە بکه‌نه‌ چرای ڕێگای خۆیان و بۆ چاره‌سه‌رکردنی هه‌ر جۆره‌ دووچاوه‌کییێک له‌ نێوان گه‌لی به‌ ئه‌مه‌گی ئێران که‌ وه‌کوو ئه‌ندامانی بنه‌ماڵه‌یێکن هه‌وڵ بده‌ن."

به‌پێی هه‌واڵی کوردپرێس، مه‌وله‌وی عه‌بدولحه‌مید ئیسماعیل زه‌هی پێشنوێژی هه‌ینیی مزگه‌وتی مه‌کی و به‌ڕێوه‌به‌ری حه‌وزه‌ی علمییه‌ی دارالعلوومی ئه‌هلی سوننه‌ی زاهیدان له‌ ڕێکه‌وتی 11ی گه‌لاوێژی ئه‌مساڵ نامه‌یێکی بۆ ڕێبه‌ری نووسیبوو و تێیدا هه‌ندێ له‌ کێشه‌کانی ئه‌هلی سوننه‌ی ئێرانی ناو بردووه‌ و خوازیاری فه‌رمانی ڕێبه‌ری باڵای شۆڕش له‌و باره‌یه‌وه‌ بوو.

پێشنوێژی هه‌ینیی مزگه‌وتی مه‌کی له‌و نامه‌یه‌دا نووسیی: ڕوونه‌ ئه‌و فه‌رمانه‌ له‌ مێژوودا تۆمار ده‌کرێت و ده‌مێنێته‌وه‌.

سه‌رچاوه‌: ماڵپه‌ڕی ڕاگه‌یێنه‌ریی نووسینگه‌ی پێشنوێژی هه‌ینی ئه‌هلی سوننه‌ی زاهیدان

کۆدی هه‌واڵنێر: 60104