به‌پێی هه‌واڵی کوردپرێس، ڕۆژی سێشه‌ممه 22ی گه‌لاوێژی 1398 به‌رانبه‌ر به 13ی ئابی 2019 فێستیڤاڵی نه‌ته‌وه‌ییی میدیا دیجیتاڵه‌کان له هۆڵی وه‌حده‌تی تاران به‌ڕێوه چوو و یه‌که‌مه‌کانی بواره جیاجیاکان خه‌ڵات کران که خه‌ڵاتی بواری به‌ڕێوه‌بردن و چاودێری کردنی تۆڕه کۆمه‌ڵایه‌تییه‌کان به‌خشرا به دووانه‌یێکی کوردی مه‌ریوانی.
فێستیڤاڵه‌که له ئاستی نه‌ته‌وه‌یی و به به‌شداریی سه‌یید عه‌باس ساڵحی وه‌زیری ڕۆشنبیری و ئه‌بولحه‌سه‌ن فیرووزئابادی سکرتێری ئه‌نجومه‌نی باڵای تۆڕه کۆمه‌ڵایه‌تییه‌کان و حسێن واعێزی سکرتێری دیوانی سه‌رۆکایه‌تیی کۆماری ئێران به‌ڕێوه چوو.
ئازاد و عەلی بەهرامی ئه‌و دووانه کورده مه‌ریوانییه‌ن که براوه‌ی خه‌ڵاتی یه‌که‌می بواری به‌ڕێوه‌بردن و چاودێری کردنی تۆڕه کۆمه‌ڵایه‌تییه‌کان بوون له فێستیڤاڵه‌که‌ی وه‌زاره‌تی ڕۆشنبیریی ئێران. ئه‌وان به‌م شێوه‌یه باسی کاره‌که‌ی خۆیان ده‌که‌ن:
له مه‌ریوانه‌وه به کاری ڕیکلام کردن و کسم و کاری ئینتێرنه‌تی ده‌ستیان پێکرد. وه‌ک خۆیان ده‌ڵێن ته‌نانه‌ت ئه‌و کاته نه‌یانده‌زانی کاره‌که‌یان نێوی "ستارتئاپ"ه ئه‌وه‌ش له حه‌وزه‌ی ITدا. پاشان له ڕێگای کۆمپانیایێکه‌وه دێنه تاران و له‌گه‌ڵ کاری تیمی و پێشکه‌وتووی ئینتێرنه‌تیدا ئاشنا ده‌بن بۆیه هه‌ر له ڕێگای ئه‌زموونه پێشووه‌کانیانه‌وه توانییان پله‌تفۆرمێک دابڕێژن به ناوی "نۆڤین هاپ" بۆ به‌ڕێوه‌بردن و چاودێری کردنی تۆڕه کۆمه‌ڵایه‌تییه‌کان که ئه‌و پله‌تفۆرمه‌ش پێویستیی هه‌موو کۆمپانیا پێشکه‌وتووه‌کانه له بواری پێوه‌ندی و ڕیکلام‌کردندا. خۆیان ده‌ڵێن دروست کردنی ئه‌و پله‌تفۆرمه یه‌ک ساڵ ماندووی کردوون و ئێستاش نزیکه‌ی یه‌ک ساڵه کارا کراوه‌ته‌وه و تا ئه‌م کاته توانیویانه 9 جۆری ماسێنجه‌ر یان تۆڕی کۆمه‌ڵایه‌تی له پلاتفۆرمه‌که‌دا به‌کار بهێنن واتا به‌کارهێنه‌ری ئه‌و تۆڕه کۆمه‌ڵایه‌تییانه ده‌توانن چ له باری کاته‌وه چ له باری شێوه‌ی ناردنی بابه‌ته‌کانه‌وه له هه‌ر 9 تۆڕه کۆمه‌ڵایه‌تییه‌که به ئاره‌زووی خۆیان بژارده‌کان هه‌ڵبژێرن. به‌شێکی دیکه‌ی ئه‌م پله‌تفۆرمه پێوه‌ندیی به ئانالیزکردنی بابه‌ته‌کانه‌وه هه‌یه. به‌کارهێنه‌ری پلاتفۆرمه‌که ده‌توانێت به خشته و ڕێژه‌ی پیشاندراو چاودێریی ڕه‌وتی ده‌رکردنی بابه‌ته‌کان بکات. ته‌نانه‌ت چاودێری‌کردنی کۆمێنته‌کان و ئه‌وه‌ی که له چ تۆڕه کۆمه‌ڵایه‌تییێک و کامه بابه‌ت یان په‌یام چ کۆمێنێکی له‌سه‌ر نووسراوه هه‌موو ئه‌مانه پیشانی به‌کارهێنه‌ر ده‌دات.
پله‌تفۆرمه‌که‌ی ئازاد و عەلی تاکه پله‌تفۆرمی کارای به‌ڕێوه‌بردن و چاودێری کردنی تۆڕه کۆمه‌ڵایه‌تییه‌کانه که له ئێران دروست کراوه و خۆیان ده‌ڵێن ده‌نگدانه‌وه‌ی باشی بووه و زۆر کۆمپانیای گه‌وره کاری پێده‌که‌ن و ئه‌وه‌ی له حه‌وزه‌ی دیجیتاڵ مارکتینگدا چالاک بێت پلاتفۆرمی نۆڤین هاپ ده‌ناسێت. ئه‌وه‌ی ده‌رده‌که‌وێت تاکه پله‌تفۆرم و باشترین پله‌تفۆرمه بۆ به‌ڕێوه‌بردنی تۆره کۆمه‌ڵایه‌تییه‌کان له ئێران ئه‌گه‌رچی نموونه‌ی ئه‌و پله‌تفۆرمه له ده‌ره‌وه‌ی وڵاتی ئێران هه‌یه به‌ڵام له ئێراندا نموونه‌ی هاوشێوه‌ی دروست نه‌کراوه و ئێستا که ئێران سزای به سه‌ردا سه‌پێندراوه نموونه ده‌ره‌کییه‌کان له ئێراندا له‌که‌ڵک که‌وتوون بۆیه کۆمپانیا و بره‌ندی گه‌وره کار به پله‌تفۆرمی نۆڤین هاپ ده‌که‌ن نموونه‌ی ته‌له‌فزیۆنی نه‌شناڵ جیۆگرافیک یان کۆمپانیای فیلیمۆ یان کۆمپانیای ئینتێرنه‌تی ته‌خفیفان یان نێت به‌رگ و زۆر کۆمپانیای دیکه‌ش که له بواری دیجیتاڵ مارکتینگدا چالاکن.
ئازاد و عەلی ده‌ڵێن: به‌رپرسانی فه‌رمی خۆیان بانگهێشتی فێستیڤاڵی میدیا دیجیتاڵییه‌کانیان کردوون بۆیه ئه‌وانیش له‌سه‌ر بانگهێشتی فه‌رمیی لایه‌نی حکومی به‌شداریی فێستیڤاڵه‌که‌یان کردووه و له بواری به‌ڕێوه‌بردن و چاودێری کردندا سێ که‌سی یه‌که‌م هه‌ڵده‌بژێردران و ئێمه‌ش وه‌ک براوه و پێشه‌نگی بواری به‌ڕێوه‌بردن له حه‌وزه‌ی میدیای دیجیتاڵ و دیجیتاڵ مارکتینگ خه‌ڵات کراین.
فێستیڤاڵی میدیا دیجیتاڵه‌کان له ئاستی نه‌ته‌وه‌ییدا به‌ڕێوه چووه و به‌ڕێوه‌به‌ری فێستیڤاڵه‌که‌ش وه‌زاره‌تی ڕۆشنبیریی ئێران بووه.
Your Comment