بەپێی هەواڵی کوردپرێس، ده‌وڵه‌ت باخچه‌لی سه‌رۆكی مه‌هه‌په له یه‌كه‌م رۆژی جه‌ژندا وه‌ک نه‌ریتێكی هه‌میشه‌یی، سه‌ردانی مه‌زاری "ئاڵپ ئه‌رسلا توركێش" دامه‌زرێنه‌ر و یه‌كه‌م سه‌رۆكی مه‌هه‌پەی كرد و دواتر رۆژه‌ڤی توركیای بۆ میدیاكارانی وڵاته‌كه‌ی هه‌ڵسه‌نگاند و رایگه‌یاند كه دوای جه‌ژن، حكوومه‌تی توركیا چاكسازی گه‌وره له چه‌ندین بواری جیاجیا ئه‌نجام ده‌دات، به‌تایبه‌تیش چاكسازی له سیسته‌می دادوه‌ری و دادگاكاندا.
باخچه‌لی له‌باره‌ی پرسی هه‌ڵبژاردنی پێشوه‌خته كه ماوه‌یێكه باسی گه‌رمی راگه‌یاندنه‌كانی توركیایه، گوتی: "توركیا پێویستی به هه‌ڵبژاردنی پێشوه‌خته نییه، بیركردنه‌وه له هه‌ڵبژاردنی پێشوه‌خته، له‌مپه‌ڕ خستنه له‌به‌رده‌م پرۆسه‌ی به‌ره‌نگاربوونه‌وه‌ی دژ به‌تیرۆر و هاندانی تیرۆریستان ده‌بێت بۆ دامه‌زراندنی ده‌وڵه‌تی تیرۆر له خوار سنووره‌كانی باشووری وڵاتمان و بوێریدانه به په‌كه‌كه و په‌یه‌ده و یه‌په‌گه و پشتگوێخستن ده‌بێت بۆ پرسی به‌ره‌نگاربوونه‌وه‌ی دژ به گرووپی فه‌تحوڵڵا گوله‌ن".
ناوبراو هه‌روه‌ها گوتیشی: "بۆیه به‌هیچ شێوه‌یێک پێویستمان به هه‌ڵبژاردنی پێشوه‌خته نییه، پێویستمان به‌ڕیشه‌كێش كردنی تیرۆر و تۆكمه كردنی زیاتری بنه‌ماكانی ئاشته‌وایی كۆمه‌ڵایه‌تی و به‌هێزكردنی ئابووری و درێژه‌دانه به فه‌رمانڕه‌واییێكی به‌هێز، كه سه‌رجه‌م ئه‌م بوارانه له رۆژانی داهاتووش پێشهاته‌كان ده‌بینرێن".
سەرچاوە: هابر7
کۆدی هەواڵنێر: 60113
Your Comment