بەپێی هەواڵی کوردپرێس ڕۆژی یەکشەمە13ی گەلاوێژ بەرانبەر بە 4ی ئابی 2019 سوپا پاسدارانی ئێران ڕایگەیاند درەنگانی ڕۆژی چوارشەمە 8ی گەلاوێژ بەرانبەر بە 30ی تەمووزی 2019 دەستی بە سەر کەشتییێکی نەوتیی بێگانەدا گرتووە کە هەڵگری 700 هەزار لیتر نەوتی قاچاخ بووە.

سوپای پاسدارانی ئێران ئەوەشی زیاد کردووە کەشتییە نەوتییەکە لە دەوروبەری بووشەهر دەستی بەسەردا گیراوە و نەوتە قاچاخەکەی ڕادەستی کۆمپانیای نیشتمانیی نەوتی ئێران کراوە و کەشتییە دەستبەسەرگیراوەکەش گوازراوەتەوە بۆ بووشەهر و ڕادەستی مەرجەعی داد کراوە.

شایانی باسە مانگی ڕابردوو پاش ئەوەی بەریتانیا لە گەرووی جەبەل تاریق دەستی بەسەر کەشتییێکی ئێرانیدا گرت ئێرانیش لە گەرووی هورموز دەستی بە سەر کەشتییێکی بەریتانیدا گرت ئەوەش بە تاوانی سەرپێچی کردن لە پەیڕەوی دەولیی ئاوەکانی جیهان.