بەپێی هەواڵی کوردپرێس، گوتەبێژی حکوومەتی هەرێمی کوردستان لە ڕاگەیاندراوەکەیدا دڵنیایی دەداتە هاووڵاتییانی هەرێمی کوردستان کە ھەوڵەکان بۆ دەستگیرکردنی ھەموو تاوانبارانی پەیوەندیدار بەم رووداوە بەردەوامە.

ئەمڕۆ شەممە 20/7/2019، دژەی تیرۆری کوردستان لە ڕاگەیاندراوێکدا دەستگیرکردنی مەزلوم داغ بکوژی سەرەکی پەیوەندار بە کردەوە تیرۆرستییەکەی سەر رێستۆرانتێکی شاری هەولێر، له‌لايه‌ن به‌ڕێوه‌به‌رايه‌تى ئاسايشى هه‌ولێر و دژه‌ تيرۆرى كوردستانەوە ڕاگەیاند.

ده‌قی راگه‌یه‌ندراوه‌كه‌ی گوته‌بێژی حكوومه‌تی هه‌رێمی كوردستان:

دوای هەڵمەتێکی فراوانی هێزەکانی ئاسایشی هەرێمی کوردستان، مەزلوم داغ سەرپەرشتیار و بکوژی سەرەکی کردەوەی تەقەکردن لە رێستورانتێکی شاری هەولێر، لەلایەن هێزی دژە تیرۆری کوردستانەوە دەستگیر کرا.

ئێمە لە کاتێکدا سوپاسی هێزەکانی ئاسایش و دژە تیرۆری کوردستان دەکەین کە بە خێرایی توانیان تاوانبارەکە دەستگیر بکەن. سوپاسی هاووڵاتیانی هەرێمی کوردستانیش دەکەین بۆ هاوکاری و پەرۆشیان. دڵنیاشتان دەکەینەوە کە ھەوڵەکان بۆ دەستگیرکردنی ھەموو تاوانبارانی پەیوەندیدار بەم رووداوە بەردەوامە.

کۆدی هەواڵنێر: 60113