بەپێی هەواڵی کوردپرێس ڕۆژی دووشەمە 24ی پووشپەڕ خالید جەعفەری بەڕێوەبەری دایرەی کشتوکاڵ لە پارێزگای کوردستان ئاماژەی بە بەرهەمی گەنمی ئەمساڵ و ڕێژەی گەنمی کڕدراو و پارەی خەرجکراوی جووتیاران کرد و ڕایگەیاند تا ئەم کاتە بڕی 50 ملیار تمەن لە پارەی گەنمی جووتیاران دراوە.

جەعفەری گوتیشی کڕینی گەنمی جووتیارانی کوردستانی لە ڕۆژی 13ی پووشپەڕەوە دەستی پێکردووە و هەموو جووتیاران دە ڕۆژ پاش ئەوەی گەنمەکەیان ڕادەستی سەنتەری حکوومیی کڕینی گەنم کرد پارەکەیان بۆ خەرج دەکرێت. بۆیە لە ڕۆژی 23ی پووشپەڕەوە 50 ملیار تمەن لەو پارەیە دراوە بە جووتیارانی کوردستانی.

ناوبراو زیادی کرد تا ئەم کاتە بە ڕێژەی 130 هەزار تەن گەنمی جووتیاران کڕدراوە و هەموو ئەو جووتیارانەی تا 19ی پووشپەڕ فۆڕمی فرۆشەکەیان ڕادەست کردووە پارەکەیان وەرگرتووە.

شایانی باسە ئەمساڵ 572 هەزار هێکتار زەویی کشتوکاڵی کوردستان بە گەنم کراوە و پێشبینی دەکرێت بە ڕێژەی یەک ملوێن و سەد هەزار تەن گەنم لە کوردستان بەرهەم بهێنرێت.