مەهدی مورادی بریکاری بەڕێوەبەری کانگا و پیشە و بازرگانی لە پارێزگای کوردستان بە هەواڵنێری کوردپرێسی ڕاگەیاند 5 کانگای زێڕ لە کوردستان چالاکە کە بریتین لەمانەی خوارەوە: ساریگۆنی لە قوروە و قوڵقوڵە و کرویان لە سەقز و قبغلوجە و مرگە نەخشینە لە کوردستان.

مورادی گوتیشی کۆی ئەو 5 کانگایە 57 ملوێن تەن ئاڵتوونی تێدایە کە کانگای ساریگۆنی لە قوروە بە تەنیا خۆی 41 ملوێن تەن لەو ئاڵتوونە لە خۆ دەگرێت.

ناوبراو زیادی کرد: ساڵی پار سێ تەن و 30 کیلۆ ئاڵتوونی پەتی و یەک تەنیش زیر لە کانگای ساریگۆنیی قوروە بەرهەم هێنراوە و هەر ئەو کانگایە هەلی کاری بۆ هەزار و 34 کەس ڕەخساندووە.

بریکاری بەڕێوەبەری کانگا و پیشە و بازرگانی لە پارێزگای کوردستان ڕوونیشی کردەوە لە کانگای قوڵقوڵەی سەقز 10.29 ملوێن تەن و لە کرویان 3.34 ملوێن تەن و لە قبغلوجە یەک ملوێن تەن و لە مەرگە نەخشینەش 50 هەزار تەن پاشەکەوتی بەردی ئاڵتوونی کانگا بەروارد کراوە.