کوردپرێس:
له‌په‌یامێكدا سه‌رۆكایه‌تی یه‌كێتی به‌بۆنه‌ی ساڵیادی دامه‌زراندنی شاری سلێمانیه‌وه رایگه‌یاند، بۆ یه‌كێتی، سلێمانی شاری هه‌ڵمه‌ت و قوربانی، دایك و هه‌ستانه‌وه و هه‌ڵگیرساندنی شۆڕش و به‌رده‌وامیی خه‌باتمانه، ئه‌مه‌ش وا ده‌كات ئه‌رك و به‌رپرسیارێتیمان زیاتر بێ به‌رامبه‌ری و له‌ئاست گه‌وره‌یی و مه‌زنیی سلێمانی خزمه‌تكاری راسته‌قینه بین، هه‌مو هه‌وڵێكمان بۆ پاراستنی شكۆ و پێشه‌نگیی و زیندوهێشتنه‌وه‌ی بێت.
ڕاگەیێندراوەکەی یەکێتی ئاماژه‌ی به‌وه‌ش كرد، به‌ڵێن ده‌ده‌ین كه ڕێگه نه‌ده‌ین سلێمانی بكرێته قوربانیی ململانێ و پێخوستی نائارامییه سیاسییه‌كان، نه‌هێڵین بكه‌وێته پاشكۆی ڕوداوه‌كان و رێنه‌ده‌ین له‌مه زیاتر و به مه‌به‌ست فه‌رامۆش و پشتگوێ بخرێت.
ده‌قی په‌یامه‌كه:
وا ئه‌مڕۆ سلێمانی ٢٣٦ ساڵه، له‌و ڕۆژه‌وه تا ئێستا هه‌میشه پێشه‌نگ بوه، له ڕوداوه كۆمه‌ڵایه‌تی، مێژویی، سیاسی، روناكبیری و ئه‌ده‌بییه‌كاندا ڕه‌چه‌شكێن بوه، داینه‌مۆ بوه بۆ چاكسازی و گۆڕانكاری و نوێكردنه‌وه له‌هه‌مو كایه‌كانی ژیاندا و له‌به‌رده‌م هه‌ر ته‌وژمێكی ناڕه‌سه‌ندا، خۆڕاگر، و بۆ هه‌ر نوێكردنه‌وه‌یه‌ك، ده‌ستپێشخه‌ر و پشتیوان بوه، سلێمانی مه‌ڵبه‌ندێكی سه‌ره‌كیی كوردپه‌روه‌ری و په‌ناگه‌ی ده‌نگی ئازاده و هه‌رگیز ده‌سه‌ڵاتی تاكڕه‌ویی قبوڵ نه‌كردوه.
سلێمانی خانه‌خوێیه‌كی میهره‌بانه بۆ هه‌مو پارت و پێكهاته و ئاینزاكان، شاری پێكه‌وه‌ژیان و یه‌كتر قبوڵكردن و ئازادیی ڕاده‌ربڕینه، شاری خۆڕاگری و به‌ره‌نگاری بوه له به‌رده‌م په‌تی سێداره، داهێنه‌ر بوه له سه‌رپێخستنی خه‌بات و جوڵانه‌وه‌ی سیاسی وه وره و وزه‌به‌خشی شۆڕش و به‌رده‌وامییه، سلێمانی ئازا و ئازاده، زیندوێتی و یاخیبون وه‌ك دو تایبه‌تمه‌ندیی ئه‌م شاره، زاده‌ی هه‌ڵكه‌وتنی ده‌یان ڕوناكبیر و تێكۆشه‌ر و كه‌سایه‌تی به‌رجه‌سته و سه‌ركرده‌ن له‌بواره جیاكانی ژیاندا، كه جێده‌ستیان له به‌ره‌وپێشبردن و زیندوێتی ئه‌م شاره و دیرۆكی كوردستاندا دیاره و بۆ ڕۆژگاری خۆیان و ئێستاش بونه‌ته ڕێنیشانده‌ر و ئاڵاهه‌ڵگری ئاینده‌یه‌كی ڕون.
ئه‌مڕۆ ئێمه له سه‌رۆكایه‌تیی یه‌كێتیی نیشتمانیی كوردستان، به دید و ڕوئیایه‌كی ڕاسته‌قینه و نوێوه له سلێمانی ده‌ڕوانین، وه‌ك چۆن دامێنی كوێستانه‌كانی كوردستان مه‌ڵبه‌ندی خۆڕسكی ژیان و گه‌شه‌ی دره‌خته ڕه‌‌سه‌ن و یاخییه‌كانه، سلێمانییش بۆ یه‌كێتی خاكی به‌پیتی ژیان و گه‌شه و نوێبونه‌وه‌یه‌تی، ڕه‌گی قوڵی یه‌كێتیی نیشتمانیی كوردستان له گۆڕستانی شه‌هیدانی ئه‌مشاره و بست به بستی كوردستاندا چۆته خوارێ و ڕه‌‌شه‌بای هه‌ر شۆڕشێكی نیشتمانی و كوردستانی، رابه‌رایه‌تی ده‌كات.
بۆ یه‌كێتی، سلێمانی شاری هه‌ڵمه‌ت و قوربانی، دایك و هه‌ستانه‌وه و هه‌ڵگیرساندنی شۆڕش و به‌رده‌وامیی خه‌باتمانه، ئه‌مه‌ش وا ده‌كات ئه‌رك و به‌رپرسیارێتیمان زیاتر بێ به‌رامبه‌ری و له‌ئاست گه‌وره‌یی و مه‌زنیی سلێمانی خزمه‌تكاری راسته‌قینه بین، هه‌مو هه‌وڵێكمان بۆ پاراستنی شكۆ و پێشه‌نگیی و زیندوهێشتنه‌وه‌ی بێ، له‌هه‌مو ڕوه‌كانه‌وه، ئاوه‌دانیی و گه‌شه‌پێدانی سلێمانی به ئه‌ركی خۆمان بزانین و له ئاست گه‌وره‌یی و شكۆمه‌ندی خه‌ڵكی سلێمانی و ته‌واوی كوردستان به‌ڵێن بده‌ین كه یه‌كێتیی نوێ، یه‌كێتیی خزمه‌ت و یه‌كێتیی حكومدارییه‌كی باشتر و ئاوه‌دانتر و شایسته‌تر بێت،
ئه‌مڕۆ و له‌م ڕۆژه مێژوییه‌دا، ئێمه له سه‌رۆكایه‌تی یه‌كێتیی نیشتمانیی كوردستان به‌ڵێن ئه‌ده‌ین كه ڕێگه نه‌ده‌ین سلێمانی بكرێته قوربانیی ململانێ و پێخوستی نائارامییه سیاسییه‌كان، نه‌هێڵین بكه‌وێته پاشكۆی ڕوداوه‌كان و رێنه‌ده‌ین له‌مه زیاتر و به مه‌به‌ست فه‌رامۆش و پشتگوێ بخرێت،
پیرۆز بێت یادی بنیادنانی شاره حه‌یاته‌كه
دڵنیا بن یه‌كێتی له‌ئاست مه‌زنی سلێمانی، به‌رپرسیار و به‌ئه‌مه‌كه
سه‌رۆكایه‌تیی یه‌كێتیی نیشتمانیی كوردستان
14-11-2020
Your Comment