بەپێی هەواڵی کوردپرێس، دەزگای تەندروستی سەر بە نەتەوەیەکگرتووەکان لە نوێترین ڕاپۆرتی هەفتانەی خۆیدا سەبارەت بە پەتای کۆرۆنا ڕایگەیاندووە، ژمارەی گیانلەدەستدان لە جیهاندا هاوشێوەی هەفتەی پێشوو ماوەتەوە و نزیکەی 8500 کەسە. لە سێ ناوچەی ڕۆژهەڵاتی ناوەڕاست، باشووری ڕۆژهەڵاتی ئاسیا و ئەمریکا گیانلەدەستدان بەهۆی کۆڤیدەوە زیادی کردووە.

هەر به‌پێی راپۆرته‌که‌ که‌ دره‌نگانێکی ڕۆژی چوارشه‌ممه‌ بڵاوکراوه‌ته‌وه‌، هه‌فتانه‌ زیاتر به‌رزبوونه‌وه‌ی حاڵه‌تی نوێی کۆڤید-19 له‌ ڕۆژهه‌ڵاتی ناوه‌ڕاست تۆمارکراوە‌، که‌ به‌ڕێژه‌ی 47% زیادیان کردووه‌.

ڕێکخراوی تەندروستی جیهانی ڕایگەیاندووە، تووشبوون بە ڤایرۆسی کۆرۆنا لە ئەورووپا و باشووری ڕۆژهەڵاتی ئاسیا بە ڕێژەی نزیکەی 32% بەرزبووەتەوە، لە ئەمریکاش بە ڕێژەی نزیکەی لە 14% بەرزبووەتەوە.

بەڕێوەبەری گشتیی ڕێکخراوی تەندروستیی جیهانی، تێدرۆس ئادهانۆم گێبریسۆس گوتی حاڵەتەکان لە 110 وڵاتدا لە زیادبووندان، کە زۆربەیان بەهۆی جۆرەکانی ئۆمیکرۆن BA.4 و BA.5ەوە بوون.

تێدرۆس لەم هەفتەیەدا لە میانی کۆبوونەوەیەکی ڕۆژنامەوانیدا گوتیشی: "ئەم پەتایە لە گۆڕاندایە، بەڵام کۆتایی نەهاتووە. گوتی توانستی بەدواداچوونی پەرەسەندنی بۆماوەی کۆڤید-19 "لە ژێر هەڕەشەدایە" لە کاتێکدا وڵاتان هەوڵەکانی چاودێریکردن و ڕێکخستنی بۆماوەیی کەم دەکەنەوە." هۆشداریدا لەوەی کە "بڵاوبوونەوەی جۆرە نوێیە سەرهەڵداوەکان و ئەگەری مەترسیدارتر قورستر لە ئارادایە."

ناوبراو داواشی کرد وڵاتان ڤاکسین دابین بکەن بۆ ئەو کەسانەی کە زۆرترین مەترسیان لەسەرە، لەوانەش کارمەندانی تەندروستی و کەسانی سەروو 60 ساڵ، ئاماژەی بەوەش کرد، سەدان ملیۆن کەس ڤاکسینیان وەرنەگرتووە و بە توندی مەترسی تووشبوون بە نەخۆشی و مردنیان لەسەرە.

تێدرۆس باسی لەوەشکرد، لە کاتێکدا زیاتر لە ملیارێک و 200 ملیۆن ڤاکسینی کۆڤید-19 لەسەر ئاستی جیهان بەکارهێنراوە، بەڵام تێکڕای ڕێژەی کوتانی ڤاکسینەکان لە وڵاتە هەژارەکاندا نزیکەی لە 13%یە.

ناوبراو گوتیشی: "ئەگەر وڵاتانی دەوڵەمەند ڤاکسین بدەن لە منداڵانی تەمەنی 6 مانگەوە و پلانیان هەیە گەڕی زیاتری پێدانی ڤاکسین سازبکەن، هزرمەندانە نییە کە پێشنیار بکەین وڵاتانی کەم داهات ڤاکسین وەرنەگرن و تەنها ڤاکسین بۆ ئەو کەسانە دابین بکرێت کە ژیانیاین زۆر لە مەترسیدایە."