فادی مەرعی، سەرۆکی نووسینگەی پەیوەندییە گشتییەکانی شەپێلا پێشارۆژا کوردستانی سووریا و ئەندامی ئەنجومەنی نیشتمانیی کورد لە گفتوگۆ لەگەڵ کوردپرێسدا ئاماژەی دا بە هەڕەشەکانی ئەمدواییەی ئەردۆغان لەبارەی هێرش کردنە سەر کوردستانی سووریا و وتی: تورکیا جیدیە لە هەڕەشەکانیدا و ساڵانی ڕابردوویش نیشانی داوە کە هەڕەشەکانی جێبەجێ دەکات.
ناوبراو درێژی دا: تورکیا تا گڵۆپی سەوزی ئەمریکا و ڕووسیای بۆ هێرش کردن هەڵنەکرێت، بۆی نییە هێرش بکاتە سەر باکووری سووریا.
سەرۆکی نووسینگەی پەیوەندییە گشتییەکانی شەپێلا پێشارۆژا کوردستانی سووریا وتیشی: تورکیا بۆ داگیر کردنی عەفرین مۆڵەتی لە ڕووسیا وەرگرت و لەبارەی سەرێکانی و گرێسپی-شەوە ئەمریکا ڕێگەی پێدا بۆیە تا ئەم دوو زلهێزە ڕازی نەبن تورکیا توانای هێرش کردنی بۆسەر تەل ڕەفعەت و مەنبەج نییە.
فادی مەرعی وەبیری هێنایەوە: کوردستانی سووریا هەموو ڕۆژێک لەژێر مەترسیی داگیرکاریی تورکیادایە و لەم بارودۆخەدا پێویستە ڕەوتە کوردەکانی سووریا بەدوای چارەسەری کێشەکاندا بن تا ئارامی بۆ ناوچەکە بگەڕێتەوە.
Your Comment