بەپێی هەواڵی کوردپرێس، بەمبارەوە شەماڵ عەبدولڕەحمان، بەڕێوەبەری ئاسایشی کوڵەجۆ بە تۆڕی میدیایی رووداوی راگەیاند، ئەو هاونیشتمانییە ناوی عەدنان عوسمانە، چەکدارەکان هەڵیانکوتاوەتە سەر ماڵەکەی و خۆی، کوڕێکی و دوو کچیان شەهید کردووە.
داعش لە هێرشەکەیدا نیشانشکێن و هاوەنی بەکارهێناوە. بەڕێوەبەری ئاسایشی کوڵەجۆ ئاماژەی بەوە کرد، چەکدارەکان بە هاوەن هێرشیان کردووەتە سەر ماڵێکی دیکەش، بەڵام زانیاری لەبارەی زیانەکانی ئەو هێرشە نەزاندراوە.
هێرشەکە لە کاژێر 10:00ـی شەو روویداوە. لە سەرەتای هێرشەکەدا، شەماڵ عەبدولڕەحمان بە رووداوی گوت، دوو کەس کوژراون. بەوپێیە، ژمارەی ئەوانەی گیانیان لەدەستداوە گەیشتووەتە شەش کەس، هەشت کەسی دیکەش بریندارن کە دوو سەربازیشیان تێدایە.
Your Comment