بەپێی هەواڵی کوردپرێس، ئاسۆ مامەند لێپرسراوی مەڵبەندی كەركووک بە SNN وتیشی: گرنگە لایەنە كوردستانیەكان بگەڕێنەوە كەركووک و ئاوڕێک لە مەترسییەكانی ئەو شارە بدەنەوە و پارێزگارێكی كورد هەڵبژێردرێت و ئەنجومەنی پارێزگای كەركووک چالاک بكرێتەوە.

بەوتەی ئاسۆ مامەند سەرژمێریی ساڵی 2020، هاوشێوەی سەرژمێری ساڵی 1957 دەبێت بە بنەمایێک بۆ دەرخستنی ڕێژەی پێكهاتەكانی كەركووک و بەتایبەت كورد لەسەرجەم ناوچە دابڕێنراوەكان.

ناوبراو دەیشڵێت "پیلان هەیە كە لە ڕێگەی تەعریب كردن و ئازاردانی كورد لە ناوچە دابڕێنراوەكان، پێگەی كورد لەسەرژمێرییەكەی 2020 لاواز بكەن و تائێستاش كورد هیچ پلانێكی بۆ ڕووبەڕووبوونەوەی ئەو مەترسییانە نییە".

ئاسۆ مامەند زیادی کرد: "وەكوو یەكێتی بڕیاری قورسی زۆرمان داوە لە كەركووک، وەک بڕیاری مانەوەمان لە كەركووک و بەشداری كردنمان لە هەڵبژاردنە پەرلەمانییەكەی عێراق، تەنها ئامانجیشمان ئەوەبوو پێگەی كورد لە كەركووک لاواز نەبێت".

لە کۆتاییدا ئاسۆمامەند ئەوەشی وت: "بەڵام بەداخەوە لەبری ئەوەی پارتی بگەڕێتەوە كەركووک و پارێزگارێكی كورد هەڵبژێردرێت، كەچی لە موسڵ پارێزگارێكی عەرەب هەڵدەبژێرێت، بۆیە باشتر وایە دەست لە موزایەدە كردن لە هەولێرەوە بهێنن".

کۆدی هەواڵنێر: 60113